Мәдени форум қорытындысы бойынша ШЫҰ елдері тарапынан Астана консенсусы қабылданады
9 Желтоқсан, 2014 12:36
Мәдени форум қорытындысы бойынша ШЫҰ елдерінің делегация жетекшілері Астана консенсусына қол қоймақ. Бұл туралы Қытай жібек жолы қорының басқарма төрағасы, «Синьао» корпорациясының вице-президенті Цзинь Юншэна «21 ғасырда бірлесе Жібек жолы мәдени ынтымақтастығы белдеуін құрамыз» атты халықаралық Жібек жолы мәдени форумында мәлімдеді.
«Пленарлы отырыстан бөлек бізде тағы 3 секциялық отырыс бар. Олардың әрқайсысы бүгінгі таңда өзекті деген мәдениеттің жекелеген секторларына арналады. Біздің ойымызша, форум шешімі қорытындысы бойынша, Астана консенсусы атты құжатты ұсынамыз. Ол Жібек жолы мәдени ынтымақтастығына арналған», - дейді Цзинь Юншэна.
Айта кету керек, аталмыш құжат Шанхай Ынтымақтастық ұйымы аясындағы ұзақмерзімді халықаралық мәдени ынтымақтастық пен көпжақты байланыстың жаңа платформасын құруға бағытталған.
Естеріңізге сала кетейік, Ежелгі Жібек жолы Батыс пен Шығыс арасындағы мәдениеттер байланысының алтын көпірі еді. Қазіргі таңда, форум қатысушыларының айтуынша, ШЫҰ елдерін біріктіретін мәдени қоғамдастықтың бір қырына айналған.
Индира Қауметова
