9 Желтоқсан, 2014 15:03

Қазақстан жаһандық ядролық қарусыздануда батыл қадамдарға шақырады

Венада ҚР және 151 елден 700-ден астам делегаттың қатысуымен ядролық қаруды қолданудың гуманитарлық зияндары туралы 3-ші Халықаралық конференция өз жұмысын бастады.

ҚР Сыртқы істер министрлігінің хабарлауынша, екі күндік конференцияда денсаулыққа, қоршаған ортаға, әлеуметтік-экономикалық дамуға, климатқа, азық-түлік қауіпсіздігі мен өзге де салаларға ядролық қарудың тигізер зияны айтылмақ.

Шараға ҚР Парламенті Сенаты мен Мәжілісінің депутаттары, СІМ қызметкерлері мен Австриядағы Қазақстан елшісі – Венадағы халықаралық ұйымдар жанындағы тұрақты өкілі Қайрат Сарыбай бастаған АТОМ жобасы өкілдерінен тұратын қазақстандық делегация қатысуда. Өз сөзінде қазақстандық делегация өкілдері Президент Нұрсұлтан Назарбаевтың ядролық қарусыздану және оны таратпау саласындағы бастамалары туралы баяндап, қазіргі таңда еліміздің жаһандық ядролық қатерді жоюдағы алдағы батыл қадамдар қабылдау қажеттілігі туралы өзінің ұстанымын да жариялады.

Конференцияда Семей ядролық полигонын жабудағы еліміздің тарихи рөлі мен тәуелсіз Қазақстан халқына ядролық қатердің жойылуы туралы әңгіме өрбіді. Өздеріңізге де белгілі, полигонның жұмыс істеген 40 жылы ішінде шамамен 500 шақты әуе, жер және жер асты ядролық сынақтары жүргізілді. Нәтижесінде жергілікті халық айтарлықтай зиянға ұшырап, аталмыш өңір радиоактивті зиян шекті. Семей полигонының жабылуы Нұрсұлтан Әбішұлының жаһандық ядролық қарусыздануға қосқан үлкен үлесі болды.

ҚР Парламенті Мәжілісі депутаты, Халықаралық істер, қорғаныс және қауіпсіздік комитеті хатшысы Виктор Рогалев жергілікті парламентарияның ұйымдастырған «Бейбітшілік жолындағы парламентария, ядролық қаруланудан ада» атты дөңгелек үстеліне қатысып, сөз сөйледі.

Сонымен қатар, конференция аясында АТОМ жобасы құрметті елшісі Кәріпбек Күйіковтың суреттер көрмесі көпшілік назарына ұсынылды. Оның басты тақырыбы Қазақстанның ядролық қарусыздану тарихына арналған. Шарада сөз алған Күйіков ядролық қару мен оның адамзат баласына берер зардабы туралы айтып, АТОМ жобасының осы жолда әлемге берері туралы тілге тиек етті.

Естеріңізге сала кетейік, АТОМ жобасын ҚР Президенті Нұрсұлтан Назарбаев алғаш болып көтеріп, 2012 жылдың 29 тамызында жариялаған еді.