• Басты
  • Қазақстанда «Әлемді өзгертетін идеялар» байқауы өтті

Қазақстанда «Әлемді өзгертетін идеялар» байқауы өтті

9 Желтоқсан, 2014 10:18
Қазақстан Республикасының Президенті – Елбасының кітапханасы «Әлемді өзгертетін идеялар» атты республикалық байқау ұйымдастырды, деп хабарлады кітапхана.

«Сайыс «Назарбаев зияткерлік мектептері»  дербес білім беру ұйымы мен  Қазақстан Республикасының Білім және ғылым министрлігіне қарасты республикалық мектеп-интернаттары арасында өткізілді. Мақсаты – Қазақстан Республикасының Тұңғыш Президенті – Елбасының идеялары мен бастамаларын зерттеп, білім беру барысында инновациялық тұрғыда қолдану», - делінген хабарламада.

Байқауға елдің барлық облыстарынан 54 оқытушы қатысты. Қатысушылар Қазақстан Республикасының Тұңғыш Президентінің кітаптары бойынша әдістемелік зерттеулерін ұсынды.    

Байқау қорытындысы бойынша Баян Төлебаева жеңімпаз атанды (Павлодар қ. химиялық-биологиялық бағыттағы Назарбаев зияткерлік мектебі тарих пәнінің мұғалімі). Екінші және үшінші орындар — Арайлым Мағзұмова (Орал қ. физика-математикалық бағыттағы Назарбаев зияткерлік мектебі тарих пәнінің мұғалімі), Жанар Жүргенбаева (Бауыржан Момышұлы атындағы Алматы қ. республикалық әскери мектеп-интернаты химия пәнінің мұғалімі).

Марапаттау рәсімі Қазақстан Республикасының Білім және ғылым министрлігінің, «Назарбаев зияткерлік мектептері»  дербес білім беру ұйымы өкілдерінің қатысуымен өтті. Байқау  жеңімпаздарына және номинаттарына сертификаттар мен естелік сыйлықтар табысталды.

 

 

Барлық жаңалықтар