• Басты
  • Қазақстанның модельерлері мен дизайнерлері ұлттық киімді сақтауда бірқатар әдіс ұсынды

Қазақстанның модельерлері мен дизайнерлері ұлттық киімді сақтауда бірқатар әдіс ұсынды

4 Желтоқсан, 2014 16:35
Бүгін ҚР Ұлттық музейінде «21 ғасыр шарттарында дәстүрлі ұлттық киімді бейімдеу мәселелері» тақырыбында дөңгелек үстел өтіп, онда Қазақстанның атақты модельерлері мен дизайнерлері ұлттық киімді сақтауда бірқатар ұсыныстар білдірді.

«Менің ойымша, Қазақстанда бұл тұрғыда көптеген келеңсіздіктер бар. Ұлттық киімді дамыту мен қазіргі тұрмыста ұлттық нақыштарды сақтап қалу күн тәртібіндегі мәселелердің бірі. Бұл жастардың кейінгі тәрбиесінде де айтарлықтай мәнге ие. Біздің ұлттық оюлар мен нақыштарымыздың өзіндік терең философиялық мәнінің өзі зерттеуге тұрарлық дүние. Дегенмен соңғы кездері аталмыш түйіннің тарқатылып, өзінің шешімін тауып келе жатқаны көңіл қуантады. Енді осыны заңнамалық тұрғыда қамтамасыз етіп, халықтың зияткерлік қасиеттерін іске қосу керек», - дейді әлеуметтік-мәдени даму комитетінің хатшысы, «Нұр Отан» партиясы фракциясының мүшесі Майра Айсина.

Отырыс барысында ғалымдар, қоғам қайраткерлері, Қазақстан сән өнерінің айтулы тұлғалары, жас дизайнерлер ұлттық киімнің бүгіні мен ертеңіне қатысты мәселелерді жан-жақты талқылап, оны жаңғырту мен заманауи талаптарға сай дайындау туралы ойларын ортаға салды. Басты мәселе – оны қазақстандықтардың күнделікті өмірде тұтынуы. Қатысушылардың айтуынша, қазіргі таңда қазақтың ұлттық киімдері өзге елдерде де айтарлықтай танымалдыққа ие.

Айта кету керек, «Отбасым» ұлттық құндылықтар оралығы «Қазақстан-2050» Стратегиясын іске асыруда өзіндік үлесін қосу мақсатында аталмыш бағытта ұлттық құндылықтарды дамыту мен сақтау бойынша мақсатты жұмыстар жүргізуде. Атап айтар болсақ, халық арасында, әсіресе жастар арасында ұлттық дәстүрге сай киіну тәртібін қалыптастыруда еңбек етуде.

Шара қорытындысы бойынша, бірқатар ұсыныстар мен пікірлер айтылып, мемлекет мойына міндеттемелер жүктелді.

Шараны ҚР Президенті жанындағы әйелдер істері және отбасы-демографиялық саясат бойынша ұлттық комиссия мен ҚР Мәдениет және спорт министрлігі, сонымен қатар ҚР Ұлттық музейінің қолдауымен «Отбасым» ұлттық құндылықтар орталығы ұйымдастырды.

Индира Қауметова

Барлық жаңалықтар