• Басты
  • Қ.Мәми сот жүйесінің ардагерлерімен кездесу өткізді

Қ.Мәми сот жүйесінің ардагерлерімен кездесу өткізді

4 Желтоқсан, 2014 15:18
Жоғарғы Сот Төрағасы Қайрат Мәми Алматы қаласында сот жүйесінің ардагерлерімен кездесу өткізді, деп хабарлады ведомствоның баспасөз қызметі.

Жоғарғы Сот Төрағасы арадагерлер мен жиынға қатысушыларды алда келе жатқан мереке – Қазақстан Республикасының Тәуелсіздік күнімен құттықтады.

 «Тәуелсіздік – Қазақстан халқының ең басты байлығы әрі ең қасиетті құндылығы. Тәуелсіздіктің арқасында Елбасы Н.Ә. Назарбаевтың басшылығымен еліміз қысқа тарихи мерзімде демократиялық, құқықтық және экономикасы дамыған мемлекет құра алды», - деді Жоғарғы Сот Төрағасы.

Сот жүйесі де еліміздің дамуына өз үлесін қосуда. Қазақстан соттары тұрғындардың күн санап артып жатқан сұраныстары жағдайында сот төрелігін іске асыруда құқық үстемділігін сақтауды қамтамасыз етуде. Бұған дәлел - жыл сайын соттарда шамамен бір миллионға жуық істің қаралуы.

Қ.Мәми ардагерлерге сот жүйесін дамыту жөнінде қолға алынып жатқан іс-шаралар туралы әңгімелеп берді. Бұлар – электронды сот өндірісін енгізу, төрешілдік рәсімдерді азайту, соттардың материалдық-техникалық базасын нығайту, судьяларды әлеуметтік қолдау, заңнамалық базаны жаңғырту, соның ішінде Азаматтық іс жүргізу және Әкімшілік кодекстердің жаңа нұсқаларын әзірлеу бойынша жүргізілген жұмыстар. 2015 жылдың 1 қаңтарынан бастап елімізде жаңарған қылмыстық заңнаманың жұмыс істейтіндігі ерекше аталып өтілді.

Кездесуде Алматы қалалық сотының төрағасы Ақжан Ештай, сот жүйесінің ардагерлері Марат Нұрбеков пен Светлана Баймұханова сөз сөйледі. 

 

Барлық жаңалықтар