ҚР Қорғаныс министрлігінің әскери қызметшісі сегізінші рет әлем чемпионы атанды

3 Желтоқсан, 2014 19:01

«Шығыс» өңірлік қолбасшылығына қарасты 32388 әскери бөлімінің әскери қызметшісі, Қазақстан Республикасының еңбек сіңірген спорт шебері, Әлем және Еуропа кубоктарының чемпионы, еліміздің бірнеше дүркін чемпионы кіші сержант Виталий Диденко кір тасын көтеру спорты бойынша сегізінші рет Әлем чемпионы болды, деп хабарлады ведомство.

Осы жылдың 20-24 қараша аралығында Германияның Гамбург қаласында өткен Әлем чемпионатында жерлесіміз екі кір тасын 146 рет серпе, 200 рет жұлқа көтеріп, (әлем рекорды) Әлем чемпионы атанды.

Екінші орынды ресейлік спортшы Андрей Кравцов иеленді. Жарысқа әлемнің 38 елінен сегіз жүзден астам спортшы қатысқанын атап өткен жөн. Қазақстан Республиксының құрама командасы Ресей құрамасына жол беріп, жалпы командалық есепте екініші орынды иеленді.

Спортшының айтуынша, ол кір тасын көтеру спортымен 15 жасынан бастап айналысып келеді. Әскери қызмет пен спортты бірге алып жүру ол үшін еш қиындық тудырмайды. Ол: «Бізде спортпен айналысуға, қызмет пен спортты қоса алып жүруге басшылықтың қолдауымен барлық жағдай жасалған.

Сонымен қатар, әрбір әскери қызметші спортпен айналысуға тиісті деп есептеймін. Мейлі, ол кәсіби спортшы болмай-ақ қойсын, міндетті түрде жарыстарға қатысу да шарт емес, бірақ, спортпен шұғылдануға міндетті», деп есептейді. Қазір В. Диденко 2015 жылы өтетін Әлем чемпионатына дайындалуда.

«Маған биылғы жарысқа қатысу айтарлықтай қиыншылық туғызған жоқ. Жеңісті бағындыру қиын болды. 2013 жылғы Әлем чемпионатында ресейлік спортшы Андрей Кравцовқа жол беріп, екінші орын алған едім. Биыл мен бірінші орынға көтерілсем, ол екінші орынды бағындырып отыр. Әзірге есеп 1-1» – дейді.

Барлық жаңалықтар