• Басты
  • Қарағандыда балаларға арналған түзету-дамыту орталығы ашылды
3 Желтоқсан, 2014 15:34

Қарағандыда балаларға арналған түзету-дамыту орталығы ашылды

Бүгін Мүмкіндігі шектеулі азаматтардың халықаралық күні, Қарағанды қаласында даму мүмкіндігі шектеулі балаларға арналған жаңа «Психологиялық-педагогикалық түзету кабинеті» ашылды, деп хабарлады «Дара» қоры.
Қарағандыда балаларға арналған түзету-дамыту орталығы ашылды

Орталықта жыл сайын  дамуында әр түрлі ауытқушылықтары бар   100-ден астам  балаға, білікті мамандар тарапынан    кешенді тегін көмек көрсетіледі. Орталықта  түзете-дамыту арқылы қолдау  көрсететін  мамандар  жұмыс істейді: педагог-психолог (эмоциялық және интеллектуалдық дамуындағы кемістіктерді), мұғалім-дефектолог (танымдық ортадағы проблемаларды), тифлопедагог (көру қабiлетiндегі кемшіліктерді), сурдопедагог (есту қабілетіндегі кемшіліктерді), мұғалім-логопед (сөйлеу қабiлетi бұзылғандарды),  емдік дене шынықтыру нұсқаушысы (жүрiп-түру мүшелерiнiң функциялары бұзылған), музыкалық ырғақ сабағының мұғалімі, емдік массаж жасайтын медбике. Сондай-ақ даму  мүмкіндігі шектелген балаларды тәрбиелеуші ата-аналарға психологиялық қолдау клубы қызмет етеді, ал балалар үшін  уақытша қысқа  мерзімдік келу тобы ұйымдастырылған.

 «Орталықтың ашылуының арқасында Қарағанды қаласындағы мүмкіндігі шектеулі балаларды   түзету көмегімен қамту 2 есеге  ұлғайтылып,   көмек  кезегінде тұрғандар саны 60%  төмендейді», - деп хабарлады Қорда.

  Түзету кабинеті «Бәріміз бірдейміз,кемсітуді  білмейміз: Біз  инклюзивтік қоғам  үшін» жобасының  шеңберінде  ашылды. Жоба мақсаты  -  мүмкіндігі шектеулі балалардың басқа қатарларымен бірге жалпы орта білім беретін мектептерде оқып, қоғамда өз орнын табуына көмектесу. 

Жобаның бас әріптесі «Самұрық-Қазына» ұлттық әл-ауқат қоры» АҚ. Орталықтың салтанатты ашылу рәсіміне  облыс әкімі Нұрмұхамбет Әбдібеков, облыстың білім басқармасының өкілдері мен  жоба демеушісі  «Дара» қайырымдылық қорының өкілдері қатысты.

 

Барлық жаңалықтар