• Басты
  • «Астана Опера» театры ұлттық музыканы халықаралық деңгейде насихаттамақ

«Астана Опера» театры ұлттық музыканы халықаралық деңгейде насихаттамақ

2 Желтоқсан, 2014 16:03
«Астана Опера» театры ұлттық музыканы халықаралық деңгейде насихаттайды, деп мәлімдеді «Астана Опера» мемлекеттік опера және балет театрының директоры Төлеубек Әлпиев ОКҚ брифингінде.

«Біз өзіміздің ұлттық музыканы насихаттайтын боламыз. Мақсат – «Біржан-Сара», «Қыз Жібек», «Абай» операларын халықаралық деңгейге көтеру. Ол үшін шет елден білікті мамандар шақырамыз. Біздің жауһарларымыз әлем сахналарында көпшіліктің көңіліне жол табуы керек. Ұлттық өнердің орындаушыларының кәсібилігін де көтереміз», - дейді директор.

Айта кету керек, қазақстандық опера әншісі Салтанат Ахметова 29 қарашада Чайковский атындағы Мәскеу консерваториясында өткен «Үлкен опера» атты жас орындаушылар байқауының жеңімпазы атанған болатын.

«Менің ойымша, біздің рухани мұрамыз әлемдік деңгейде танылуы тиіс. Ешбірі де шетел шығармаларынан асып түспесе, кем түспейді. Қазақ өнерін енді әлемнің тануына еңбек ететін боламыз», - дейді өз кезегінде С.Ахметова.

Қазақстандық әншінің қоржынында қазіргі таңда бірқатар республикалық және халықаралық байқаулар жүлделері бар. Олардың арасында Бибігүл Төлегенова атындағы байқау мен Глинки, Villaincanto (Италия) байқаулары жүлдегері бар. Бір жыл бұрын әнші Германиядағы Neue Stimmen халықаралық байқауында арнайы Klassik-Herbst Forderpreis сыйлығына ие болды.

Камила Амирова

Барлық жаңалықтар