Астанада жас депуттардың тұңғыш халықаралық форумы өтеді

Форумның басты мақсаты түрлі өкілдік және заңнамалық билік органдарының жас депутаттарының заң шығару және жобалық қызметтерінің тиімділігін арттыру болып табылады. «Бағыт-2030» ЖДХФ жұмысына Қазақстан, Ресей, Беларусь, Армения, Қырғызстан мен Өзбекстанның барлық деңгейдегі депутаттары қатысады. Сонымен қатар, Қазақстан Республикасы Парламенті депутаттары, жергілікті және орталық мемлекеттік орган өкілдері, қоғамдық және саяси қайраткерлер мен БАҚ өкілдері шақырылды.

«Бірінші күні Форумның ресми түрде ашылуы өтіп, онда форумға қатысушы елдердің жас депутаттарының өзара ынтымақтастық салалары талқыланып, жергілікті өзін өзі басқару, кәсіпкерлік мен әлеуметтік-мәдени диалогты дамытудағы жастар мен халықтың қатысу тәжірибесі зерттелмек. Шарада Еуразиялық экономикалық одақ аясындағы интеграциялық процестерге жас депутаттардың қатысуы басты назарда болмақ», - дейді ұйымдастырушылар.

Екінші күні алдыңғы қатарлы қазақстандық саясаткерлер мен ҚР Парламенті депутаттарымен кездесу өтеді.

Форум қорытындысы бойынша резолюция қабылданып, жас депутаттар мен мемлекеттік органдар, азаматтық сектор мен БАҚ арасындағы өзара байланысты жетілдіру бойынша ұсыныстар қаралады.