• Басты
  • Павлодардың тұрғындары «Қолжетімді тұрғын үй-2020» бағдарламасы бойынша баспанаға ие болды

Павлодардың тұрғындары «Қолжетімді тұрғын үй-2020» бағдарламасы бойынша баспанаға ие болды

18 Қараша, 2014 10:47
Қазақстан Республикасы Тұңғыш Президенті күні қарсаңында павлодарлықтар «Қолжетімді тұрғын үй-2020» бағдарламасы бойынша «Тұрғын үй жинақ банкі» АҚ арқылы жаңа пәтерлер алды, деп хабарлады облыс әкімдігі.

9 қабатты 3 подъезді жаңа үйде 108 пәтер бар.

Қоныс тойына құттықтау айта келген облыс әкімі Қанат Бозымбаев тұрғындарды қолжетімді, сапалы және заманауи баспанамен қамтамасыз ету – стратегиялық міндет екенін атап өтті.

«Бүгінгі таңда 12 мың павлодарлық баспана кезегінде тұр. Тұрғындарды баспанамен қамтамасыз ету мақсатында біз биылғы жылы барлық қаржыландыру көздері есебінен 165 мың шаршы метр тұрғын үйлерді, ал 2015 жылы 166 мың шаршы метр тұрғын үйлерді пайдалануға беруді жоспарладық. Биыл 90 мың шаршы метр тұрғын үйді пайдалануға бердік. Бұл - төрт жүзден аса отбасы жаңа баспаналы болды деген сөз. Жаңа баспаналар түрлі бағдарлама бойынша, оның ішінде тұрғын үй жинақ банкі жүйесі арқылы да салынып жатыр. Бұл бағдарлама арқылы салынатын тұрғын үйлерге қажетті жылу, сумен қамтамасыз ету және электр қуаты резерві де ескерілген», - деді Қ. Бозымбаев.

 

Барлық жаңалықтар