СҚО-да «Нұрлы Жол» Жолдауының басым бағыттарын іске асыру жоспары айқындалды

«Петропавл әуежайның ұшу-қону жолағын қалпына келтіру бойынша жобалау-сметалық құжаттамасына 150 млн теңге бөлінді. 2015 жылы 700 шақырым жолға жөндеу жұмыстары жүргізіледі. Аталмыш жұмыстар барлық ауданда өтеді. Индустриялды инфрақұрылымды дамыту жұмыстарына ерекше назар аударылмақ», - дейді облыс әкімі Ерік Сұлтанов.

Оның айтуынша, Индустрияландыру картасының алғашқы бесжылдығы аясында облыста 31 жоба картаға енді, олардың жалпы құны 38 млн теңге. Қазіргі таңда соның 29-ы іске асырылды. Бұл өз кезегінде 1045 жұмыс орнын ашып, кәсіпкерліктердің белсенділік деңгейлерін 4 есеге дейін көбейтуге мүмкіндік берді.

Әкімдіктің хабарлауынша, Индустрияландыру картасының екінші бесжылдығында 100 млрд теңгенің 70 жобасы қаралып жатыр.

«Биыл өңірдегі апатты жағдайдағы мектептер мәселесін шешу үшін Буденное ауылында 90 орындық жаңа мектеп құрылысы басталды. Сонымен қатар, Мамлютка ауылында да 300 орындық білім ордасы салынбақ. Осылайша облыстағы апатты жағдайдағы мектептер мәселесі бірожола шешімін таппақ. Ал үш ауысымды мектеп мәселесіне келер болсақ, өңірде мұндай мектептер саны 2-еу. Қазіргі таңда бастапқы шаралар қолға алынуда. 2015-2017 жылдарға арналған бюджетте осыған қаражат қаралады», - дейді.