• Басты
  • 2014 жылы 44 балабақша пайдалануға беріледі – Е.Иманғалиев (Видео)

2014 жылы 44 балабақша пайдалануға беріледі – Е.Иманғалиев (Видео)

13 Қараша, 2014 14:48
2014 жылы 44 балабақшаны пайдалануға береміз. Олардағы жалпы орын саны 11,4 мыңды құрайды, деп мәлімдеді ҚР Президентінің кезекті Жолдауын талқылауға арналған БҒМ брифингінде білім және ғылым вице -министрі Есенғазы Иманғалиев.

«2014 жылы 44 балабақшаны пайдалануға береміз. Олардағы жалпы орын саны 11,4 мыңды құрайды. Жүргізілген мониторинг бойынша, бүгінге дейін 7,7 мың орындық 33 балабақша салынған. Жыл соңына дейін 3,7 орындық тағы 11 балабақша салу жоспарланып отыр. Солардың арасында 1640 орындық алты балабақша бойынша қазіргі таңда акті толтырылуда», - дейді вице-министр.

Оның айтуынша, Мемлекет басшысы мектепке дейінгі білім беру нысандарын салуда мәселесінің тек қана бюджет қаражатының мойнына ғана жүктелмеу керектігін айтты.

«Осы орайда аталмыш мақсатта бөлінген 20 млрд теңге мемлекеттік-жеке меншік әріптестік бойынша да қажеттілікті өтей алмай отырған Астана мен Алматы қалалары, демографиялық өсім қарқынды байқалып жатқан Алматы облысы және Оңтүстік Қазақстан облыстарына мақсатты түрде бағытталады. Жалпы елдегі мектепке дейінгі білім беру нысандарын салуда мемлекеттік-жеке меншік әріптестіктің үлесі зор, Елбасы Жолдауынан кейін өзге де өңірлер осы мәселеге көңіл аударуы тиіс. Осы орайда әлеуметтік әріптестік пен жекелеген тұлғалардың да ат салысуы маңызды», - дейді Е.Иманғалиев.

Бауыржан Мұқанов 

Барлық жаңалықтар