Қ.Тоқаев Марокко Королі Мохаммед VI-ның арнаулы уәкілімен келіссөз жүргізді
13 Қараша, 2014 09:32
Мароккоға ресми сапары аясында Қазақстан Республикасы Парламенті Сенатының Төрағасы Қасым-Жомарт Тоқаев Марокко Королі Мохаммед VI-ның арнаулы уәкілі, кеңсе басшысы Омар Азиманмен Фес қаласындағы резиденциясында кездесті, деп хабарлады Сенаттың баспасөз қызметі.
Сенат Төрағасы, Әлемдік және дәстүрлі діндер лидерлері Съезінің басшысы Қ.Тоқаев түрлі діндер арасындағы толеранттық пен өзара құрмет рухын ілгерілету жөніндегі Марокко Королінің күш-жігерін жоғары бағалай отырып, 2015 жылғы 10-11 маусымда Астанада өтетін Әлемдік және дәстүрлі діндер лидерлері V Съезіне әзірлік туралы хабардар етті.
«Астана форумына Мохаммед VI-ның өзінің қатысуы Съездің идеяларын ілгерілетуге маңызды үлес қосып, әлемдік мәдениеттер мен діндерді жақындастырудың жаһандық үдерістерінде Марокконың беделі мен рөлін нығайтуға жәрдемдеседі», - деді Қ.Тоқаев.
Ол Король Мохаммед VI-ға Қазақстан Президенті Н.Назарбаевтың Астана қаласында болатын V Съезге шақыруын жеткізді.
