Б.Сағынтаев: ҮИИД МБ аясында 69 мың тұрақты жұмыс орны ашылды

11 Қараша, 2014 11:47

ҮИИД МБ бірінші бесжылдығында 650 жоба жүзеге асырылып, 69 мың тұрақты жұмыс орны ашылды, деп мәлімдеді ҚР Үкімет басшысының бірінші орынбасары Бақытжан Сағынтаев Мемлекет басшысы төрағалығымен өтіп жатқан «Нұр Отан» партиясы Саяси кеңесінің кеңейтілген отырысында.

«Индустриялды-инновациялық даму мемлекеттік бағдарламасының екінші бесжылдығы қабылданды. Бірінші бесжылдықта индустрияландыру картасы аясында 3 трлн теңгенің 673 жобасы іске асырылып, нәтижесінде 69 мың тұрақты жаңа жұмыс орны ашылды», - дейді Бақытжан Сағынтаев.

«Қабылданған шаралардың арқасында өңдеуші өнеркәсіп тау-кен өндіру саласымен салыстырғанда үлкен қарқынмен өсіп келе жатыр, алайда өңдеуші саланың өсіміне қарамастан оның ЖІӨ-дегі үлесі азайды. 2011 жылы оның үлесі 11,4% болса, 2013 жылы бұл көрсеткіш 10,9% құрады. Оған себеп ЖІӨ номиналды көлемінің артуы», - дейді.

Сонымен қатар, оның айтуынша, өңдеуші саладағы еңбек өнімділігі 8% артса, ауыл шаруашылық саласында бұл көрсеткіш 17,4% ұлғайған.

Естеріңізге сала кетейік, бүгін Астанада Мемлекет басшысының төрағалығымен «Нұр Отан» партиясы Саяси кеңесінің кеңейтілген отырысы өтіп жатыр.

Индира Қауметова