СҚО-да Польша мәдениет үйі ашылды

«Польша мәдениет үйі СҚО-ның Ясная Поляна  ауылында бой көтерді. Ауылдың бір жарым мың тұрғыны бар, олардың 80% - поляктар. Олар үшін Польша мәдениет үйінің ашылуы көптен күткен қуаныш», - делінген хабарламада.

Мәдениет үйінің ашылу салтанатына Қазақстандағы Польша Республикасының Өкілетті елшісі Яцек Ключковский қатысты. Ол екі ел арасындағы ынтымақтастықтың одан ары дамуының маңызды екенін атап өтті.

«Мен қазақстандық билікті  осындай жағдай жасағаны және ұлтаралық және конфессияаралық келісім саласында жүргізіп отырған алғыр саясаты үшін алғыс білдіргім келеді. Себебі оның ұстанып отырған саясаты өзге ұлт өкілдерінің оның ішінде поляктардың мәдениетін дамыту проблемасын шешуге септігін тигізуде», - деді елші.

Аймақ басшысы Ерік Сұлтановтың айтуынша, жаңа нысан мәдениетті сақтаудың тағы бір орталығы болады және ұлттар арасындағы бірлікті сақтауға септігін тигізеді. «Аталмыш маңызды шара Қазақстан мен Польшаның арасындағы ынтымақтастықты одан ары дамытуға, нығайтуға септігін тигізетініне сенімдімін», - деді облыс әкімі.

Айта кетерлік жайт, Польша үйіне аймақ басышысы мен Қазақстандағы Польшаның Өкілетті елшісі атынан бағалы сыйлықтар тарту етілді.