Байқау жеңімпазы темір тұлпардың кілтін алды
«Аталмыш шараға еліміздің барлық өңірінің термешілері жаңа термелерімен қатысып, өз бақтарын сынаған болатын. ҚР мәдениет және спорт министрлігінің бұл байқауды өткізудегі негізгі мақсаттарының қатарына асыл сөздің маржаны мен терең ойдың тұнығын әуезді әнмен жеткізетін термені насихаттау мен тарату арқылы халықты бірлікке, бауырмалдыққа, отанын сүюге, тілін, дінін құрметтеуге шақыру. Қазақстан Республикасында тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру жөніндегі 2014-2016 жылдарға арналған іс-шаралар жоспарының 37 тармағын және ҚР Президенті – Н. Назарбаевтың «Ұлытау төріндегі толғаныс» атты сұхбатында айтылған негізгі бағыттарды орындауға бағытталған шараға мемлекетіміздің әр облысынан және Астана, Алматы қалаларынан келген өкілдерімен қатар эстрада жұлдыздары да атсалысты», - делінген хабарламада.
Терме – қазақ халқы өнерінің асыл қазынасы, оның өсіп келе жатқан ұрпақтардың бойында отансүйгіш және туған елінің мәдениеті мен өнеріне деген сыйластық қасиеттерін қалыптастырып, халықтың бірлігі мен татулығын асқақтату жолында ойнайтын рөлі зор.
Байқаудың бас жүлдесін Астана қаласының термешісі Елмұра Жаңабергенова, бірінші орынды батыс қазақстандық Армат Исламғалиев, екінші орынды Оңтүстік Қазақстан облысынан келген Кеңесбай Әшірбаев және үшінші орынды Ерболат Шалдыбеков иеленді.
Айта кетерлік жайт, байқаудың ашылу салтанатына Қазақстан Республикасы Мәдениет және спорт вице-министрі Ғ. Ахмедьяров, ҚР Парламент депутаттары, өнертанушылар, жыршы-термешілер, елімізге танымал қоғам қайраткерлері, ақын-жазушылар, бұқаралық ақпарат құралдарының өкілдері және өнер сүйер қауым өкілдері қатысты.
