Талдықорған қаласында жаңа орталық мешіт ашылды

Облыс әкімі Амандық Баталов ашылу салтанатында жиналған қауымды құттықтап Елбасының сындарлы саясаты нәтижесіндегі қоғамдық келісім мен ұлтаралық тұрақтылыққа кеңінен тоқталды.

«Тәуелсіздік жылдары діни конфессиялар арасында татулық, өзара келісім берік орнықты. Тұңғыш Президентіміз Нұрсұлтан Әбішұлы Назарбаев ұлттар мен ұлыстарды ұйыстырып, елімізде дінаралық диалогтың жарқын үлгісін қалыптастырды. Қазақстандағы этносаралық толеранттылықты әлемге паш етті. Соның бір айғағы, бүгінгі ашылып отырған мына мешіт те халықтың игілігі үшін салынған. Қазіргі қоғамға ауадай қажет нәрсе - имандылық. Иман – адам баласының екі дүниедегі бақыты, баға жетпес азығы. Ендеше бұл мешіт рухани азықпен сусындатар кәусар бұлақ секілді, мәдени-ағарту, ізгілік пен бірліктің орталығы болады», - деп атап өтті Амандық Баталов.

Бүгінгі таңда облыс көлемінде 391 мешіттің қызмет көрсететінін айта кеткен жөн. Жаңа мешіт тек құлшылық орны ғана емес, сонымен қатар, мұнда кітапхана, медресе, неке қию орындары бар.

Жаңа мешіт 2 қабаттан, бір мезетте өзіне 1200 адамға дейін сыйдыра алатын әсем ғимарат негізінде тұрғызылды. Құрылыс жұмыстарын «Ауыл құрылысы» ЖШС-і барлық діни архитектуралық заңнама-дәстүрлерді сақтай отырып жүргізді. Ғимарат аумағы 4 500 шаршы метрді құраса, мешітке тиесілі аумақ көлемі 3 га жуық.