• Басты
  • «Астана Опера» театрының жетекші солисті Сүндет Байғожин Италияда өнер көрсетеді

«Астана Опера» театрының жетекші солисті Сүндет Байғожин Италияда өнер көрсетеді

7 Қараша, 2014 19:36
«Астана Опера» театрының жетекші солисті Сүндет Байғожин 11 қарашада алғаш рет Верона қаласындағы (Италия) Filarmonico театрында, Дж. Пуччинидің «Богема» операсында бас партияда ойнайды. Кассадағы билеттер әлдеқашан сатылып кеткен.

Театрда хабарлағандай, бүгінде әнші белгілі итальяндық дирижер Ядер Биньяминимен қызу дайындық жүргізіп жатыр. «Жас та, жалынды әншілер тобымен жұмыс істеген маған ұнайды, олар менімен бірге конкурстан өтті, барлығының да дауысы әдемі. Бұл мен үшін өте маңызды қойылым, себебі бұдан ары қарайғы еуропалық мансабым осы жерде қалай өнер көрсеткеніме байланысты. Қала бойы ілінген афишаларды көріп, өз-өзіме сүйсініп қоямын, мен «Астана Опера» театры атынан тек «Богема» операсында ғана емес, сонымен қатар алдағы жылдың 14 сәуірінде осы сахнада қойылатын Джоаккино Россинидің «Севильдік шаштараз» операсында да ойнаймын», - дейді жетекші солист. 

Сүндет Байғожин ең басты әрі жауапты міндет – еуропалықтар қазақстандық әртістің жұмысын бағалай алу үшін, еліміздің атынан лайықты өнер көрсету екендігін атады.

Баритон Сүндет Байғожин өткен жылдың 10 қарашасында Арена ди Верона қоры (Италия) өткізген конкурста жеңіске жетіп, беделді итальяндық Filarmonico театрында өнер көрсету мүмкіндігін иеленгенін естеріңізге салайық. 

Барлық жаңалықтар