Соңғы үш жылда техникалық мамандықта оқитын студенттар саны 10 пайызға артты – Суханбердиева

5 Қараша, 2014 12:51

Соңғы үш жылда техникалық мамандықтар бойынша білім алып жатқан студенттер саны 10 пайызға артып, 2718 адамнан 3306 адамға жетті. Бұл туралы бүгін Астанада өтіп жатқан «Кәсіптік білім және бизнес: Әріптестік сұхбаты» қалалық форумында Астана қалалық білім беру басқармасы басшысы Эльмира Суханбердиева мәлімдеді.

«Қазіргі таңда Астананың 34 колледжінде 28 мыңнан астам маман білім алуда. Қаланың техникалық және кәсіптік білім беру жүйесінде 66 түрлі мамандық пен 113 біліктілік бар. Астана қаласы әкімдігінің қолдауының арқасында, жергілікті және республикалық бюджеттен бөлінетін мемлекеттік білім беру тапсырысын ұлғайту есебінен соңғы үш жылда техникалық мамандықтар бойынша білім алып жатқан студенттер саны 10 пайызға артып, 2718 адамнан 3306 адамға жетті», - деді білім басқармасының жетекшісі.

Оның айтуынша, 2013 жылы мемлекет колледждердің материалдық-техникалық базаларын нығайту мақсатында 204 млн теңге бөлсе, соның 79 млн теңгесі жергілікті бюджетке тиесілі.

«2014 жылы осы мақсатта республикалық бюджеттен 175 млн теңге бөлінді. Жыл сайынғы қаржыландыру көлемінің артуы құрылыс, автокөлік транспортын жөндеу мен пайдалануға беру, жұмыскер мамандықтар, коммуналды шаруашылық, радиоэлектроника мен байланыс және өзге де мамандықтардың материалдық базасын нығайтуға мүмкіндік беріп отыр», - дейді ол.

Бауыржан Мұқанов

Барлық жаңалықтар