ПМУ студенттері жастар патриотизмі мәселелерін талқылады

«Шараның мақсаты – жаңа қазақстандық патриотизмнің идеялық негізін насихаттау, жастар ортасында оларды дамыту бойынша нәтижелі әдістерді анықтау», - делінген хабарламада.

Дөңгелек үстелдің модераторлық қызметін С.Торайғыров атындағы ПМУ философия және әлеуметтік-гуманитарлық пәндер кафедрасының меңгерушісі, филос.ғ.к.  Гауһар Ахметова мен этносаралық және конфессияаралық үрдістерді зерттеудің аймақтық ғылыми-практикалық орталығы басшысы Нұржамал Тышқанова атқарды.

Дөңгелек үстелде жастардың арасында өмірге деген дұрыс көзқарас қалыптастыруда студенттік ұйымдардың рөлі, жастардың әлеуметтік кемелденуі, азаматтық жауапкершілікті қалыптастыру мәселелері қаралды. Сондай-ақ, дөңгелек үстел жұмысында студенттердің бойына елдің мәдени бірегейлігіне, рухани және ұлттық қауіпсіздігіне қауіп-қатер тудыратын адамгершілікке жат қылық (былапыт сөздер, нашақорлық, маскүнемдік) жемқорлық, экстремизм сияқты жат құбылыстарға азаматтық ұстанымды тәрбиелеуге профессорлық-оқытушылар құрамының атсалысуы туралы  да сөз қозғалды. Қатысушылар оқытушылардың студенттерді дәріс және тәжірибелік сабақтың мазмұнында тәрбиелеу бағыты бойынша өзара пікір алмасып, тұщымды ойлар айтты.

Баяндамашылардың қорытынды сөзі мен ұсыныстары ескеріліп, дөңгелек үстел жұмысы шеңберінде резолюция қабылданды.