• Басты
  • Қазақстан Жазушылар одағының 80 жылдығына орай ғимаратты қайта жөндеуден өткізу үшін 40 млн теңге бөлінді

Қазақстан Жазушылар одағының 80 жылдығына орай ғимаратты қайта жөндеуден өткізу үшін 40 млн теңге бөлінді

4 Қараша, 2014 10:02
Қазақстан Жазушылар одағының ғимаратын қайта жөндеуден өткізу үшін жергілікті бюджеттен 40 млн. теңге бөлінгенін Алматы әкімі Аметжан Есімов айтты, деп хабарлады қала әкімдігі.

«Алматыда Қазақстан Жазушылар одағының 80 жылдығы мерекеленді. Мерейлі шараға Алматы әкімі Ахметжан Есімов, шығармашылық және ғылыми интеллигенция өкілдері, жақын және алыс елдердің делегациялар мүшелері қатысты», - делінген хабарламада.

Мегаполис басшысы өзінің құттықтауында Жазушылар одағының тарихи мәнін атап өтті.

«Алматыда осындай үлкен шараның өтуі тегін емес. Қаламыздың мәдени - ағарту орталық атануында ақын, жазушылардың сіңірген еңбегі зор. Сонау 1934 жылы Ілияс Жансүгіровтың басшылығымен құрылған Жазушылар одағы халқымыздың рухани өміріне зор үлес қосуда», - деді Ахметжан Есімов.

Аталған шарада бұрыннан қалыптасқан дәстүрді байыту, шығармашылықты әлем мен қоғамда болып жатқан өзгерістерге сәйкестендіру, әдебиеттегі үндестік мәселелері сөз болды.

«Уақыт бір орнында тұрмайды, оқырмандар талабы да өзгереді. Жазушлар маңызды мәселелерді қалт жібермеулері тиіс. Қолына қалам ұстаған зиялы қауым мұраға тек әдебиетті ғана емес, саналы тәрбиені де қалдырғандары абзал. Сонда ғана жас дарындар көзі ашылатын болады», - деп атап өтті Ахметжан Есімов.

Айта кетейік, Елбасы Н.Назарбаев Жазушылар Одағының мерейлі мерекесімен Ақорданың ресми сайтында құттықтаған болатын.

 

Барлық жаңалықтар