Қостанай облысында жыл соңына дейін 8,5 мыңнан астам автокөлік шығарылады
31 Қазан, 2014 12:24
Өңірде 2011 жылы 869 көлік шығарылса, 2013 жлы бұл көрсеткіш 7,5 мыңға ұлғайды. Енді 2014 жылы облыста 8,5 мыңнан астам көлік шығару жоспарланып отыр, деп мәлімдеді бүгін облыс әкімі Нұралы Садуақасов ОКҚ брифингінде.
«Егер 2011 жылы 900 жеңіл көлік жиналса, 2012 жылы 2,5 мың көлік шығардық. Ал 2013 жылы бұл көрсеткіш 7,5 мыңға дейін жетті. Енді биыл жыл соңына дейін тағы 8,5 мың көлік жинау жоспарланып отыр. Зауыттан күн сайын SsangYong, Iveco, Peugeot, Hyundai, Toyota секілді атақты модельдердің автокөліктері шығарылады. Алдағы уақытта бұлардың қатарына қытайлық көліктер де келіп қосылуы мүмкін», - дейді әкім.
Айта кету керек, Қостанай облысында машина құрастыру саласы жыл санап қарқынды дамып келе жатыр. 2014 жылдың алғашқы тоғыз айында өңдеуші саладағы осынау сектордың үлес салмағы 22,6% (38,7 млрд теңге) құрады, бұл 2011 жылғы көрсеткіштен 11,2 % (20,1 млрд теңге) артық.
Индира Қауметова
