«Тіл – татулық тірегі» байқауында Мемлекеттік күзет қызметі жеңіске жетті

30 Қазан, 2014 15:18

Кеше Бейбітшілік және келісім сарайында Бас прокуратураның бастамасымен және Мәдениет және спорт министрлігінің Тілдерді дамыту және қоғамдық-саяси жұмыс комитетінің қолдауымен «Тіл – татулық тірегі» атты республикалық байқауы өтті.

Жарысты қазылар алқасының төрағасы, беделді қоғам қайраткері Мырзатай Жодасбеков қорытындылады. Байқаудың бас жүлдесін Мемлекеттік күзет қызметі жеңіп алды, ал бірінші орынды Бас прокуратура, екінші орынды Қорғаныс министрлігі, ал үшінші орынды Жоғарғы Сот пен Ұлттық қауіпсіздік комитеті иеленді.

Жарысқа Бас прокуратура, Жоғарғы Сот, Ұлттық қауіпсіздік комитеті, Мемлекеттік күзет қызметі, Ішкі істер министрлігі, Қорғаныс министрлігі, Мемлекеттік қызмет істері және сыбайлас жемқорлыққа қарсы іс-қимыл агенттігі, Қаржы министрлігінің Кедендік бақылау комитеті қызметкерлерінен құралған 8 топ қатысты. Әрбір ведомство өкілдері өздерінің мемлекетттік тілді жетік меңгергендіктерін көрсетіп, оны кәсіби қызмет барысында еркін қолдана білетін дағдыларын ортаға салды.Жеңімпаздар бағалы сыйлықтармен марапатталды. Ал ерекше көзге түскен үздік қатысушылар Бас прокуратураның алғыс хаттарымен марапатталды.

Индира Қауметова

Барлық жаңалықтар