2014 жылғы Мемлекеттік сыйлықты тағайындау жөніндегі комиссияның қорытынды отырысы өтті
23 Қазан, 2014 17:29
ҚР Мемлекеттік хатшысының міндетін атқарушы – ҚР Президенті Әкімшілігінің Басшысы Нұрлан Нығматулиннің төрағалығымен Қазақстан Республикасының әдебиет пен өнер саласындағы 2014 жылғы Мемлекеттік сыйлығын тағайындау жөніндегі комиссияның қорытынды отырысы өтті, деп хабарлады Ақорданың баспасөз қызметі.
«ҚР Мемлекеттік хатшысының міндетін атқарушы – ҚР Президенті Әкімшілігінің Басшысы Нұрлан Нығматулин отырыстың маңыздылығын атап айтты, өйткені оның қорытындысында ең лайықты жұмыстар бірқатар номинациялар бойынша лауреаттарды бекіту үшін Мемлекет басшысына ұсынылады», - делінген хабарламада.
Мемлекеттік сыйлықтан үміткерлерден барлығы 29 жұмыс келіп түскен, соның 11-і екінші кезеңге өтті.
Комиссия мүшелері Мемлекет басшысына ұсынылатын үміткерлерді құпия дауыс беру арқылы анықтады. Мемлекеттік сыйлық лауреаттарын марапаттау рәсімі дәстүр бойынша Тәуелсіздік күні қарсаңында өтеді.
