23 Қазан, 2014 12:43

Алматы облысының ІІД үздік қызметкерлеріне көлік беріледі – әкімдік

Келесі жылдан бастап Алматы облысының үздік учаскелік полиция инспекторына және үздік аудандық ішкі істер басқармасына автокөлік берілетін болады.Кеңесте 2014 жылдың 9 айының қорытындысы бойынша облыстық ішкі істер департаментінің қылмыспен күресті күшейту, құқықтық тәртіпті нығайту және құқық бұзушылықтың алдын алу жұмыстарының нәтижесі туралы мәселе қаралды, деп хабарлады облыс әкімдігі.

«Біз жыл сайын мұғалімдердің, дәрігерлердің, ауыл шаруашылығы саласы мамандарының жұмысын қорытындысы бойынша ынталандырып, ақшалай марапат немесе көлік сыйлаймыз. Мен биылдан бастап осы үрдісті ішкі істер саласына да енгізуді ұсынамын. Үздік учаскелік инспектор мен үздік аудандық ішкі істер басқармасын анықтап, автокөлік беруді, басқа да түрлі номинация бойынша байқаулар өткізіп, жүлдегерлерін марапаттауды қолға аламыз», - деді өңір басшысы.

Жақында ІІД-ның Талдықорған қаласында орналасқан құрылымдық бөлімшелерін аралағанын, соған сәйкес қажет жерлерде материалдық-техникалық базаларын жақсарту, аумағын кеңейту, ғимараттарды күрделі жөндеу мәселелеріне қатысты тиісті көмек көрсетілетінін айтты. Сондай-ақ келер жылы учаскелік полиция пунктімен инспекторға арналған тұрғын үйді бірлестіре салу жобасы толыққанды жүзеге асырылмақ.

Жиын соңында бірқатар қызметкерлер облыс әкімінің Құрмет грамотасымен және Алғыс хатымен марапатталды.