22 Қазан, 2014 15:21

ЭКСПО-2017 көрмесіне дейін 10 автотұрақ салынады

Халықаралық көрме қарсаңында Астанадағы жол қозғалысын ретке келтіру мақсатында елордада 10 автотұрақ салынатын болады, деп мәлімдеді бүгін «ЭКСПО-2017 Халықаралық мамандандырылған көрмесіне дайындық және өткізу дирекциясы» ЖШС басқарушы директоры Мұхтар Ғазизов.

«Қаланың батыс және шығыс кіреберісінде автовокзалдар құрылысы қолға алынады. Қазіргі таңда автовокзалдың техникалық-экономикалық негіздемесі дайындалды. Олар Абылай хан мен Қобыл көшесінің қиылысында және Тілендиев пен Байсекеев көшесі қиылысында бой көтермек. Мемлекеттік-жеке меншік әріптестік аясында Астана қаласында 10 көлік тұрағы салынады. Бірінші кезекте 1729 көлік орнына есептелген үш тұрақ. Екінші кезекте 4085 көлікке арналған 7 тұрақ салынбақ. Осылайша қаладағы көлік ағымы ретке келтірілмек», - дейді ол.

Сонымен қатар, басқарушы директордың айтуынша, қазіргі таңда темір жол вокзалының құрылысы басталуда. Ол Мыңжылдық аллеясында орын тебеді.

«Бейбітшілік және келісім сарайының шығыс жағында аталмыш вокзал орналасады. Осы арқылы тәулігіне 35 мың адам қатынай алады. Халықаралық әуежайды қалпына келтіру жұмыстарынан кейін оның өткізу мүмкіндігі тәулігіне 40 мың адамды құрамақ», - дейді ол.

М.Ғазизов өз сөзінде елордада қазірден бастап Эко-такси жобасының іске қосылғанын еске салды. 2017 жылға қарай жобадағы көліктер саны 500-ге дейін жетпек.

Бауыржан Мұқанов

Барлық жаңалықтар