22 Қазан, 2014 14:27

ЭКСПО аумағында 40 шақты нысан бой көтереді – А.Марат

Бүгін «ЭКСПО-2017» Халықаралық мамандырылған көрмесіне қатысушылардың бірінші жиналысы барысында «Астана ЭКСПО-2017» ұлттық компаниясы» АҚ сәулет және құрылыс департаментінің бас менеджері Айдар Марат ЭКСПО көрмесінің бас жоспарын таныстырды.

Департамент басшысының айтуынша, көрменің инфрақұрылымын жасау арқылы бүгінгі Астананың тұрақты даму барысын көрсету керек.

«ЭКСПО-кешеннің өзі қала аумағына кіреді. Астананың бас жоспары бойынша оған 175 гектар жер бөлінді. ЭКСПО-қалашығы Назарбаев университеті мен медициналық кластердің маңайында орналасады. Бұдан бөлек, 150 гектар жер көрменің қосымша нысандары мен көлік инфрақұрылымына бөлінген. Онда қоғамдық көлік пен тұрақтар болады», - дейді А.Марат.

Оның сөзіне қарағанда, көрме кешені орналасатын аумақтың 42 пайызы павильондарға беріледі. Ал қалған территорияда мәдени шараларды өткізуге арналған ашық және жабық алаңдар болады. ЭКСПО-қалашықта Қазақстанның ұлттық павильоны,4 тақырыптық павильон, көрмеге қатысушы мемлекеттердің павильондары,үкіметтік емес ұйымдар мен корпоративтік қатысушылар, сондай-ақ Үздік тәжірибелер аймағы.

Жалпы, ЭКСПО-қалашығының құрылысына 8 мердігер компания қатысуда. Олар 38 нысанды салып береді. Кешен құрылысы 2016 жылдың желтоқсан айында аяқталады.

Айта кетейік, «ЭКСПО-2017» Халықаралық мамандырылған көрмесіне қатысушылардың бірінші кездесуі - Париждегі Халықаралық көрмелер бюросы Бас ассамблеясының 155 сессиясында «ЭКСПО-2017» Халықаралық көрмесін Қазақстанда өткізу туралы ресми шешім қабылданғаннан кейінгі алғашқы шара.

Бауыржан Мұқанов

Барлық жаңалықтар