ЭКСПО-2017 көрмесі жаңартылмалы қуат көздері саласындағы жетістіктер алаңы болады – Б.Сағынтаев
ЭКСПО-2017 көрмесі жаңартылмалы қуат көздері саласындағы ең үлкен жетістіктер алаңы болады, деп мәлімдеді бүгін ҚР Үкімет басшысының орынбасары Бақытжан Сағынтаев Астанада өтетін «ЭКСПО-2017» халықаралық мамандандырылған көрмесіне қатысушылардың бірінші кездесуінде.
«Халықаралық көрмеге дайындық жұмыстары өз деңгейінде кестеге сай жүріп жатыр. Елбасы ЭКСПО көрмесінің әлемдік деңгейдегі маңызын ескере отырып, Үкіметтің осы мақсатта қарқынды жұмыс істеуін өз бақылауына алған. Өзі бастап нысандар құрылысында болып, 2017 жылы аталмыш шараны абыроймен атқаруды тапсыруда», - дейді Б.Сағынтаев.
Оның айтуынша, ЭКСПО-2017 көрмесі жаңартылмалы қуат көздері саласындағы жетістіктер ұсынылатын алаң болмақшы. Оның тақырыбы «Болашақтың энергиясы» мәселесі де бүгінгі таңда адамзатты алаңдатып отырған дүниелердің бірі.
«Бүгінде бұл тақырыптың әлемдік қауымдастық пен адамзаттың назарын аударып отырғаны рас. Дәстүрлі қуат көздерінің түгесілер шағында адам баласының баламалы қуат көздерін қолға алуы заңды. Осы орайда Астанадағы ЭКСПО көрмесі осы саланың әлемдік деңгейде дамуына серпін берері анық», - дейді ол.
Айта кетейік, аталмыш шара Париждегі Халықаралық көрмелер бюросы Бас ассамблеясының 155 сессиясында «ЭКСПО-2017» Халықаралық көрмесін Қазақстанда өткізу туралы ресми шешім қабылданғаннан кейінгі алғашқы шара.
Екі күндік форумға Халықаралық көрмелер бюросының (ХКБ) басшылығы, ЭКСПО Комиссары хатшылығының қызметкерлері, сондай-ақ ЭКСПО-2017 көрмесіне ресми шақырту алған 86 елдің 200-ден астам өкілі қатысуда.
Бұдан былай Астанадағы Халықаралық қатысушылардың жиналысы ЭКСПО-2017 көрмесі басталғанша жыл сайын өткізілетін болады.
Бауыржан Мұқанов