Лондонда Британ-Қазақ қоғамының екінші қайырымдылық марафоны өтті
22 Қазан, 2014 10:34
Лондон қаласының орталығындағы Гайд Паркте Қазақстанның Ұлыбританиядағы Елшілігі қызметкерлерінің белсенді қатысуымен Британ-Қазақ қоғамының Екінші қайырымдылық марафоны өткізілді.
ҚР Сыртқы істер министрлігінде хабарлағандай, ұзындығы 10 км құраған жарыс көшбасшысы Лондон Олимпиадасының чемпионы Серік Сәпиев болса, марафонға қатысушылар қатарында Британ-Қазақ Қоғамының мүшелері саналатын қазақстандық компаниялар Air Astana, A-Global Resources, Grata, Equus Petroleum, Bolashak Group өкілдері, ҚР Президентінің халықаралық «Болашақ» стипендиясы шеңберінде британдық жоғары оқу орындарында дәріс алып жатқан қазақстандық студенттер болды.
Марафоннан жиналған қаржы «АЯЛА» қайырымдылық қорының «Дәрігер – Бөлме» жобасына жолданатын болады. Аталмыш жоба шеңберінде Алматы және Ақмола облыстарының балалар үйлерінде (Тылдықорған, Щучинск қалалары) сенсорлық бөлмелер ашу жоспарланған.
