Көкшетауда мемлекеттік этносаясаттың міндеттері мен басымдықтары талқыланады -ҚХА
Аталған семинар-тренинг Қазақстан Республикасы Президенті Әкімшілігінің Қазақстан халқы Ассамблеясы Хатшылығы өкілдерінің, Қазақстан Республикасы Президенті жанындағы Мемлекеттік басқару академиясының, «Қоғамдық пікір» зерттеу институтының, «Көкше» академиясының профессор-оқытушылық құрамының, сондай-ақ Болгария мен Германия елдерінен келген шетелдік сарапшылардың қатысуымен өтеді.
«Семинар-тренингтің тыңдаушылары Ақмола, Солтүстік Қазақстан және Қостанай облыстарының этносаралық және конфессияаралық қатынастар мәселелерімен айналысатын мемлекеттік қызметшілері, сондай-ақ этномәдени, діни, жастар және басқа да қоғамдық ұйымдардың, бұқаралық ақпарат құралдарының, жоғарғы оқу орындарының өкілдері болып табылады», - деп хабарлады ҚХА.
Семинар-тренинг Қазақстан Республикасы Президенті - Елбасы Н. Назарбаевтың «Қазақстан - 2050» Стратегиясы: Қалыптасқан мемлекеттің жаңа саяси бағыты» атты Жолдауы аясында этносаясат және этносаралық қатынастар саласындағы қызметті әдіснамалық, ғылыми-әдістемелік және кадрлық қамтамасыз ету жұмыстарын жетілдіру мәселелеріне арналған.
Семинар-тренинг барысында жаһандық және өңірлік тегеуріндер мен тәуекелдер жағдайында мемлекеттік этносаясаттың қазіргі кезеңдегі міндеттері мен басымдықтары қарастырылады.
Сонымен қатар, қатысушылар көші-қон үдерістерін реттеудің халықаралық тәжірибесін зерделеп, Қазақстан Республикасы этносаясатының қарқынды дамуындағы этномәдени бірлестіктердің рөлін талқылайды.
Қазақстандық ғалымдар өңірлік саясаттың маңызды бағыттары туралы баяндап, қазақ диаспорасының көші-қондық әлеуетін, ұлттық бірлікті нығайтудың негізгі факторларын түсіндіреді.
