Сенат комитетінде халықаралық құжаттарды ратификациялау туралы заң жобалары қаралды

21 Қазан, 2014 18:51

Бүгін Қазақстан Республикасы Парламенті Сенаты Аграрлық мәселелер, табиғатты пайдалану және ауылдық аумақтарды дамыту комитетінің кеңейтілген отырысында«Азық-түлік қауіпсіздігі жөніндегі Ислам Ұйымының жарғысын ратификациялау туралы» заң жобасы қаралды, деп хабарлады Сенаттың баспасөз қызметі.

«Ислам Ұйымының Азық-түлік қауіпсіздігі жөніндегі жарғысы Ислам Ынтымақтастығы Ұйымына мүше мемлекеттер Сыртқы істер министрлері кеңесінің Гвинея Республикасы, Конакриде болған 40-шы сессиясында 2013 жылғы 10 желтоқсанда қабылданған болатын.Ислам Ұйымының азық-түлік қауіпсіздігі жөніндегі мақсаттары Ислам Ынтымақтастығы Ұйымына мүше мемлекеттерге ауыл шаруашылығын тиімді дамыту, азық-түлік қауіпсіздігі және биотехнологияны дамытудың түрлі мәселелері бойынша сарапшылық тәжірибе мен техникалық жаңалықтарды беру болып табылады», - делінген хабарламада.

Ұйымның құрылуы Ислам Ынтымақтастығы Ұйымына мүше мемлекеттерге қазақстандық астық пен азық-түліктің басқа да түрлерін жеткізуді одан әрі ұйымдастыруға, Қазақстанда және басқа да елдерде экспорт көлемін ұлғайтуға ықпал ететін ірі инвестициялық және инфрақұрылымдық жобаларды іске асыруға мүмкіндік береді.

Комитеттің кеңейтілген отырысында «Қазақстан Республикасының Үкіметі мен Қытай Халық Республикасының Үкіметі арасындағы Қорғас өзенінде «Достық» бірлескен ортақ су торабын басқару және пайдалану туралы келісімді ратификациялау туралы» заң жобасы да қаралды. Келісімге 2013 жылғы 7 қыркүйекте қол қойылған болатын.

Заң жобасы Палатаның қарауына жіберілді.

Барлық жаңалықтар