Нью-Йоркте Семей шартына қатысты брифинг өтті – СІМ
«Брифингті Семей шартына қатысушы-мемлекеттер – Қазақстан Республикасының, Қырғыз Республикасының, Тәжікстан Республикасының, Түрікменстан мен Өзбекстан Республикасының БҰҰ жанындағы тұрақты өкілдіктері шақырды. Қазақстан Республикасы Шарттың төрағасы ретінде БҰҰ мүше-мемлекеттерін, халықаралық ұйымдардың, азаматтық институттар мен үкіметтік емес ұйымдардың өкілдерін шарттың мақсаттары және өңірде бұндай зонаны құрушы мемлекеттер алдында қойылған міндеттер туралы хабардар етті», - делінген хабарламада.
Зонаның құрылуы өңірдегі қауіпсіздікті, тұрақтылықты және бейбітшілікті қамтамасыз ету ниетімен Орта Азияның барлық бес елдерінің бірлескен күш-әрекеттерінің жемісі болып табылады. Орта Азиядағы ядролық қарудан азат зона Ядролық қаруды таратпау шартын іске асыруға, сондай-ақ өңірлік және әлемдік қауіпсіздікті күшейтуге қосатын нақты үлес болып келеді.
Семей шартына қатысушы-мемлекеттерге негативтік қауіпсіздік кепілдіктерін беру мәселесі бойынша ұзақ консультациялар үрдісі 2014 жылғы 6 мамырда табысты мәресіне жетті. Бұл күні ядролық мемлекеттер – Ұлыбританияның, Қытайдың, Ресейдің, АҚШ пен Францияның жоғары өкілдері Шартқа қатысушылардың көзінше Орта Азия мемлекеттеріне қарсы ядролық қаруды қолданбау немесе қолдану қатерінен қауіпсіздік кепілдіктерін беру туралы шарттың ажыратылмайтын бөлігі болып табылатын Хаттамаға қол қойды.
