20 Қазан, 2014 19:31
Астанада Қамқоршы күні атап өтіледі
Астанада қыркүйек күні «Балаларға жылу сыйла» ұранымен республикалық «Қамқоршы күні» акциясы өтеді, деп хабарлайды «Бәйтерек» медиа орталығы.
Қамқоршы күні – елде енді ғана қалыптасып келе жатқан мереке. Бұл күннің бекітілуіндегі мақсат қамқоршы жандарды қолдау, патронатты тәрбиешілерді елеп-ескеріп, бала асырап алған отбасыларға құрмет көрсету.
«Астана қалалық білім беру басқармасының мәліметінше, бұл күні жетім және қамқоршысынан айырылған балаларды асырап алған 100 қамқоршының шеруі өтпек», - делінген хабарламада.
Хабарламада айтылғандай, кездесу барысында психология, заңгерлік секілді түрлі тақырыптар бойынша қамқоршыларға кеңес беруге арналған ақпараттық алаң ұйымдастырылады.
Сонымен қатар, аталмыш шараның ұйымдастырылуы әлеуметтік жетімдіктің алдын алуға айтарлықтай үлес қосып, жетім және қамқоршысынан айырылған балаларға қамқорлық пен жылу сыйлауға мүмкіндік береді.
