Маңғыстау облысында «Қазақстанның аймақтық дамуы» жобасы жүзеге асырылуда
20 Қазан, 2014 14:33
Маңғыстау облысында «Қазақстанның аймақтық дамуы» жобасы шеңберінде ШОБ пен АЭА-ның дамуы, облысты ауыз сумен қамтамасыз ету, аймақтық даму барысында азаматтардың атсалысуы сынды мәселелердің бүгінгі жағдайына сараптама жүргізілді. Жобаның халықаралық сарапшылары түрлі тақырыптар бойынша оқу-семинарларын, халықаралық конференцияларды өткізді және мамандар Ирландия руспубликасына іс-тәжірибеден өтуге жіберілді, деп облыс әкімдігінен хабарлады.
« Жоба ECORYS (Нидерланды), GOPA Consultants (Германия), Shannon Development (Ирландия) және Қазақстанның аймақтық дамуы ҒЗИ (Қазақстан) консорциумы GDSI Limited (Ирландия) басшылығымен жүзеге асырылуда. Ол заңнамалық, стратегиялық және институцианалды мәселелерді аймақтық дамыту саласына Үкімет саясатын енгізу жолында маңызды», - делінген хабарламада.
Айта кетерлік жайт, жобаның негізі заңнамалық және институционалды базаға, әрекет жоспары мен білікті кадрлар санына негізделген.
2013 жылы Маңғыстау облысы Шығыс Қазақстан және Қызылорда облыстарымен бірге Еуроодақтың «Қазақстанның аймақтық дамуы» атты жобасын жүзеге асыру бойынша пилоттық ретінде таңдалып алынған.
