• Басты
  • ҚР оқушыларына әлемдік деңгейдегі колледждерде оқу мүмкіндіктері мен шарттары түсіндіріледі

ҚР оқушыларына әлемдік деңгейдегі колледждерде оқу мүмкіндіктері мен шарттары түсіндіріледі

20 Қазан, 2014 09:53
Биылғы жылдың 20-26 қазаны аралығында «Кәсіпқор» Холдингінің өкілдері Алматы, Қостанай мен Маңғыстау облыстарына барып, әлемдік деңгейдегі колледждері мен Атырау қаласындағы мұнай-газ саласы мамандарын даярлау және қайта даярлаумен айналысатын өңіраралық APEC PETROTECHNIC орталығына түсу үшін оқушылар арасында кәсіби бағыттау жұмыстары жүргізеді.

Холдингтің хабарлауынша, Алматы мен Астана қалаларындағы әлемдік деңгейдегі колледждер мен Атыраудағы аталмыш орталықта білім алу мүмкіндіктерін кеңінен таныстыру мақсатында «Кәсіпқор» Холдингі ҚР Білім және ғылым министрлігімен бірлесіп ел мектептерінің түлектерімен кәсіби бағыттау жұмыстарын жүргізеді.

«Солтүстік Қазақстан, Атырау және Батыс Қазақстан облыстарында брифингтер өткізілді. Холдинг өкілдері көптеген қалалар мен ауылдық жерлердегі мектептерге барып, әлемдік деңгейдегі колледждерде оқу мүмкіндіктері мен шарттары туралы айтты. Көптеген оқушылар шаралардың арқасында мол мағлұмат алып, жоғары деңгейде қызығушылық байқатты. Енді облыс орталықтары оқушыларында да аталмыш шараны өткізу жоспарланып отыр», - делінген хабарламада.

Ақпараттық түсіндіру жұмыстарынан бөлек болашақ мектеп түлектері математика мен ағылшын тілінен тест тапсырып, бірінші іріктеу кезеңінен өту мүмкіндігіне ие болады.

Хабарламада айтылғандай, сынақтан сәтті өткен студенттер ағылшын тілінде тегін білім алып, шетелдік оқытушылардың дәрісіне қатысып, өзіне қажетті мамандықты еркін меңгеріп шықпақ. Оқу аяқталғаннан кейін студенттер қазақстандық және халықаралық деңгейдегі диплом алады.

Сонымен қатар, әлемдік деңгейдегі колледждерде оқығысы келетін кез келген талапкер www.kasipkor.kz сайтынан талапкерлерге арналған онлайн-тіркеуден өтеді.

Барлық жаңалықтар