Елбасы «Азия-Еуропа» форумының 10-саммитінің бейресми сессиясына қатысты

17 Қазан, 2014 17:55

Мемлекет басшысы «Еуропа мен Азия арасындағы диалог пен ынтымақтастықты нығайту және АСЕМ болашағы» тақырыбындағы сессияға қатысты, деп хабарлады Ақорданың баспасөз қызметі.

Нұрсұлтан Назарбаев сондай-ақ Азия-Еуропа» форумының 10-саммиті аясында бірқатар екіжақты кездесулер өткізді.

«Корея Республикасының Президенті Пак Кын Хемен әңгіме барысында инвестиция, технология және сауда-экономика салаларындағы ынтымақтастықты одан әрі дамыту мәселелері қозғалды, сондай-ақ Пак Кын Хенің Қазақстанға сапары кезінде жасалған уағдаластықтардың жүзеге асырылу барысы талқыланды», - делінген хабарламада.

Жапония Премьер-Министрі Синдзо Абэмен кездесуде сауда-экономикалық, ғылыми-техникалық және инвестициялық өзара іс-қимыл мәселелері сөз болды. Сонымен қатар тараптар халықаралық күн тәртібіндегі өзекті жайттарға да тоқталды.

Қытай Халық Республикасының Мемлекеттік Кеңес Премьері Ли Кэцянмен әңгімеге екіжақты қарым-қатынастарды нығайту және Нұрсұлтан Назарбаевтың Қытайға сапары кезінде жасалған уағдаластықтарды жүзеге асыру мәселелері арқау болды.

Барлық жаңалықтар