Алматыда француздық капиталдың қатысуымен 85 кәсіпорын тіркелді - әкімдік

16 Қазан, 2014 18:36

Алматыда француздық капиталдың қатысуымен 85 кәсіпорын тіркелсе, 30 кәсіпорын екі тараптың бірлесуі арқылы жұмыс істеуде. Алып шаһар мен Францияның тауар айналымы 2013 жылы 27% өсіп, 527 млн АҚШ долларын, ал 2014 жылдың бірінші жартыжылдығында 254,6 млн АҚШ долларды құрады, бұл туралы Алматы әкімі Ахметжан Есімов Францияның халықаралық қатынасты одан әрі дамыту және сыртқы сауда, туризмді алға жылжыту, шетелдегі француздар мәселелері жөніндегі Мемлекеттік хатшысы Маттиас Фекльмен кездесуінде айтты.

Әкімдікте хабарлағандай, кездесу Астанада өтетін қазақстандық-француздық үкіметаралық комиссиялардың отырысы қарсаңында өтті. Қала басшысы өз сөзінде Алматының Франциямен жоғары деңгейде іскерлік байланыс орнатқандығын жеткізді.

«Желтоқсан айында Француз Республикасының Президенті Франсуа Олланд елімізге сапар жасайды деп күтілуде. Бұл сапардың Қазақстан мен Франция арасындағы қарым-қатынасты одан әрі нығайта түсетіні анық», - деді Ахметжан Есімов.

Кездесу барысында қалада Абай атындағы ҚазҰПУ базасы негізінде «Сорбонна - Қазақстан» француз институты ашылғаны айтылды, бұл қазақстандықтарға озық білім алуға мүмкіндік береді. Бұдан өзге Алматыда халықаралық колледж жанынан француз мектебінің секциясы, француз тілінде дәріс беретін балабақша ашылады деп жоспарлануда.

Өз кезегінде Маттиас Фекль француз компанияларының Алматыдағы түрлі жобаларға қатысуға ынталы екенін жеткізді. Бұл жобалар - транспорт инфрақұрылымы, қаланың коммуналды шаруашылығы, денсаулық сақтауды дамыту салалары.

Барлық жаңалықтар