• Басты
  • Астанада кәсіптік мамандарды дайындау стратегиясы талқыланды (ФОТО)

Астанада кәсіптік мамандарды дайындау стратегиясы талқыланды (ФОТО)

16 Қазан, 2014 12:18
Бүгін Астанадағы Гуманитарлық колледждің 70 жылдық мерейтойы аясында педагог мамандардың «Кәсіптік мамандарды дайындау стратегиясы: проблемалары мен болашағы» атты халықаралық ғылыми-тәжірибелік конференция өтті.

Шара қатысушылары кәсіптік білім берудің өзекті мәселелерін талқылап, баяндамашылар педагог мамандарды дайындау, мамандардың кәсіптік құзіреттілігін қалыптастыруда ғылым мен білімді интеграциялаудың инновациялық моделі мен әдістемелік негіздеріне назар аударылды.

«Кәсіптік білім беру жүйесіне соңғы уақыттарда көп көңіл аударылуда. Қазіргі таңда жүйеде 849 колледж бар, онда 500 мыңнан астам адам білім алуда. Бұл 14-29 жас аралығындағы жастар мен жасөспірімдердің 17 пайызын құрайды. Қазір материалды-техникалық базаны қамтамасыз ету жүйесі жақсартылып, біліктілікті арттыру курстары өтуде. Онымен шектелмей жаңа колледждер де бой көтеріп, ал қолда бар колледждерге тиісті корпустар мен жатақханалар қосылуда», - дейді ҚР БҒМ Кәсіптік-техникалық және орта білімнен кейінгі білім беруді жаңғырту департаменті директоры Сабыржан Мадеев.

Сонымен қатар, С.Мадеевтің айтуынша, кәсіптік білім беру жүйесінде білім берудің аталмыш бағытының имиджіне қатысты мәселелер әлі де болса күн тәртібінен түсер емес.  

«Аталмыш салада тағы да бірсыпыра қиындықтар да жоқ емес. Біріншісі – колледждердің имиджі. Бізге әлі де болса 9-11 сынып бітірген ең әлсіз деген оқушылар келеді. Бұл жалпы білім беру жүйемізде айтарлықтай қиындықтар тудырады», - дейді С. Мадеев.

Сонымен қатар, департамент директорының айтуынша, кәсіптік білім беру жүйесін жаңғыртып, оны орта білім беретін мектептер мен гимназиялардан бастау керек.  

Қазіргі кезде ғылым мен техниканың жетістіктерін, заманауи білім беру технологияларын кәсіби маман даярлау процесінде пайдалану маңызды екендігі айқын. Осыған орай кәсіби білімнің мақсаты, мазмұны және оны оқыту тәсілдері қайта қаралып, оқу жүйесін реттеу, жетілдіру, ұйымдастыру мәселелері зерттеліп, өз шешімін табуды қажет етеді. 

Еліміздегі кәсіби білім берудің көп деңгейлі құрылымы және оның халықаралық білім беру жүйесіне жоспарлы интеграциялануы, оқу орнын қазіргі заманның талаптарына сай басқару мәселелері жаңа тәсілдерді де талап етеді.  

Конференцияның мақсаты  педагог кадрлар даярлау жүйесін жетілдіру, тәжірибе алмасу, жаңашылдыққа ұмтылудың жаңа мүмкіндіктерін ашуға ықпал ету болып табылады.

Индира Қауметова

Суретке түсірген Азамат Алиев

Барлық жаңалықтар