• Басты
  • Ақмола облысында студенттік өзін-өзі басқару органының үйлестіру кеңесі құрылды
16 Қазан, 2014 10:16

Ақмола облысында студенттік өзін-өзі басқару органының үйлестіру кеңесі құрылды

Көкшетауда Ақмола облысы жастар саясаты басқармасы ұйымдастырған «Studactiv 2014» Ақмола облыстық студенттік өзін-өзі басқарудың I форумы өтті.
Ақмола облысында студенттік өзін-өзі басқару органының үйлестіру  кеңесі құрылды

Шараға 150-ден астам адам қатысты. Олардың арасында ЖОО тәрбие жөніндегі проректорлары, облыстық техникалық және кәсіптік оқыту ұйымдары директорларының тәрбие ісі бойынша орынбасарлары, оқу орындарының жастар ісі комитеті жетекшілері мен облыстың қала мен аудандарының жастар ресурстық орталықтарының  басшылары бар.  

Хабарламада айтылғандай, форумда студенттік өзін-өзі басқару өкілдері арасында тәжірибе алмасып, студенттік ұйымдар байланыстарының дамуы мен нығаюы, облыстың оқу орындарында студенттік өзін-өзі басқаруды дамытудың тиімді моделін қалыптастыру мәселелері қаралды.

Форумда сөз алған облыс әкімінің орынбасары Нұрлан Нүркенов студент жастардың тұрмыстық, әлеуметтік-экономикалық, құқықтық мәселелерін шешу, жастар бастамасын қолдау саласындағы ынтымақтастықты орнату мен дамыту бойынша өзара келісе отырып жұмыс істеу үшін осындай шараларды өткізудің маңызы жоғары екенін атап өтті.

«Бүгінде студенттердің өзін-өзі басқаруы жастардың тек ұйымшылдықтарының ғана өлшемі емес, сонымен қатар ЖОО басқару жұмыстарында да студенттердің ат салысуының да бір көрінісі», - дейді әкім орынбасары.

Сонымен қатар, форум барысында Қазақстан Республикасы Президенті Нұрсұлтан Назарбаевтың Қазақстан халқына «Қазақстан жолы-2050»: Бір мақсат, бір мүдде, бір болашақ» Жолдауын іске асыру мәселесі бойынша семинар-жиын ұйымдастырылды.

Форум делегаттары секцияларға қатысып, онда 2020 жылға дейінгі «Қазақстан 2020: болашаққа жол» мемлекеттік жастар саясаты тұжырымдамасын іске асыру, жастар арасында діни экстремизмнің алдын алу, жастар арасында жемқорлыққа қарсы «нөлдік төзімділік» қалыптастыру, жастар бұзақылықтарының алдын алу мәселелері талқыланды.

Форум жұмысы қорытындысында студенттік өзін-өзі басқару органдарының облыстық үйлестірку  кеңесі құрылатын болды. Оның мақсаты облыстық оқу орындарының жастар ісі комитетінің басын біріктіру, студентердің білім беру процестерін басқару, студенттер жастар өмірінің маңызды мәселелеріне қатысты шешімдер қабылдауға қатысу құқығын қамтамасыз ету болып табылады.

«Кеңестің алдағы уақыттағы жұмыс жоспары – студенттерді кәсіби бағыттау бойынша қолдау шараларын ұйымдастыру, түлектерді жұмыспен қамту, жатақханалардағы әлеуметтік-тұрмыстық жағдайларын жақсарту жұмыстары, дене шынықтыру және спортты дамыту мен студенттердің бос уақыттарын тиімді өткізу», - деп хабарлайды әкімдік.

Айта кету керек, бүгінгі таңда Ақмола облысындағы 4 ЖОО мен техникалық және кәсіптік білім берудің 37 ұйымында жастар ісі комитеті белсенді жұмыс жасауда.  

Барлық жаңалықтар