Алматы облысында XVII жазғы Азия ойындарының чемпиондарына 1 млн теңгеден сыйақы берілді

16 Қазан, 2014 09:32

Оңтүстік Кореяның Инчхон қаласында өткен XVII жазғы Азия ойындарының чемпиондары Алматы облысының әкімі Амандық Баталовтың қолынан 1 млн теңге мөлшерінде сыйақы алды, деп хабарлады облыс әкімдігі.

Өңір басшысы спортшыларға жоғары көрсеткіштерге қол жеткізгендері үшін, ал жаттықтырушыларға елдің, облыстың абыройын асқақтатқан спортшыларды тәрбиелегендеріне ризашылығын білдірді.

«Біз қазақстандық спортшылардың әр сайысын қалт жібермей қарап отырдық. Әсіресе, облыс спортшылары үшін қатты алаңдадық. Сіздер жерлестеріңіздің үмітін ақтадыңыздар! Сіздер – біздің облыстың және еліміздің мақтанышысыздар. Бұл еңбектеріңіз зор ілтипат пен марапатқа лайық», - деді облыс әкімі А.Баталов.

Еске сала кетсек, Қазақстан ұлттық құрамасы жазғы Азия ойындарында 84 медальға қол жеткізіп, Қытай, Оңтүстік Корея мен Жапониядан кейінгі төртінші орынды иеленді. Алматы облысының 35 спортшысы осы бәсекеде ел намысын қорғады. Олар 3 алтын, 1 күміс, 3 қола – жалпы саны 7 медаль алып қайтты.

Барлық жаңалықтар