• Басты
  • С.Қайырбекова: Туберкулезбен күресте бүкіл қоғамның күш-жігерін біріктіру керек (Фото)

С.Қайырбекова: Туберкулезбен күресте бүкіл қоғамның күш-жігерін біріктіру керек (Фото)

15 Қазан, 2014 09:47
Астанада ҚР Денсаулық сақтау және әлеуметтік даму бірінші вице-министрі С.З.Қайырбекованың төрағалығымен селекторлық режімде туберкулезбен сырқаттанушылықты төмендету жөніндегі республикалық штабтың кеңейтілген отырысы болып өтті.

Жиынға мүдделі мемлекеттік органдар мен ведомстволардың өкілдері қатысты.  

«Салидат Қайырбекова Қазақстан ғаламдық бәсекеге қабілеттілік индексінде ұстанымын жақсартқанымен, туберкулездің дәріге төзімді түрімен сырқаттанушылық көлемінің артуы, сондай-ақ, қылмыстық-атқару жүйесі мекемелеріндегі туберкулезге шалдыққан науқастарға көрсетілетін көмек жайы мамандарды алаңдатып отырғанын алға тартты», - деп хабарлады денсаулық сақтау және әлеуметтік даму министрлігі.     

Оған қоса, жиынға қатысушылар жергілікті атқарушы орган өкілдерінің назарын: жылдам диагностикалау қондырғыларымен жабдықтау, науқастарды әлеуметтік қолдау, туберкулезге қарсы бірқатар ұйымдардың материалдық-техникалық базасын инфекциялық бақылау талаптарына сәйкестендіру сияқты туберкулезге қарсы іс-шаралар көлемінің жеткіліксіз болып отырғанына аударды.     

Республикалық штаб шеңберінде бірінші вице-министрі Медициналық қызметті бақылау комитетіне пенитенциарлық жүйенің туберкулезге қарсы мекемелеріне тексеру жүргізуді тапсырды.

«Туберкулездің созылмалы түрлерімен ауыратын науқастарды тиісті емдеу мәселелері республикалық штабтың келесі отырысында тыңдалатын болады», - делінген хабарламада.    

 

 

Барлық жаңалықтар