ҚР Үкіметі отырысында шағын және орта бизнесті қолдауға бөлінген 100 млрд теңгені игеру мәселелері талқыланды
Нақты айтқанда, Үкімет мүшелері мүлікті заңдастыруға, квазимемлекеттік сектор нысандарын жекешелендірудің екінші толқынына, Ұлттық қордан ШОБ қолдауға бөлінген 100 млрд теңге игеруге, сондай-ақ «Агробизнес-2020» және Жұмыспен қамтудың жол картасы бағдарламаларын жүзеге асыру барысына қатысты мәселелерді талқылады.
Аталған тақырыптар бойынша келесі министрлер баяндама жасады: қаржы министрі – Б.Сұлтанов, ұлттық экономика министрі – Е.Досаев, инвестиция мен даму министрі – Ә.Исекешев, ауыл шаруашылығы министрі – А.Мамытбеков, денсаулық сақтау және әлеуметтік даму министрі – Т.Дүйсенова. Сонымен бірге, ұлттық экономика министрлігінің басшысы 2014 жылдың 9 айы бойынша «Ақ Бұлақ» бағдарламасын жүзеге асыру қорытындылары туралы баяндады.
Е.Досаев хабарлағандай, «Ақ Бұлақ» бағдарламасының іс-шараларын жүзеге асыруға 2014 жылы 112,8 млрд теңге қарастырылған, олардың ішінде ауылдар мен қалада сумен жабдықтауды және су бөлуді дамытуға 91,8 млрд теңге бөлінген».
«2014 жылдың 1 қазанындағы жағдай бойынша жергілікті атқарушы органдар 63,64 млрд теңгені немесе есептік кезеңнің жоспарын 97,9% игерді. Игермеудің басты себебі конкурстық процедуралардың кеш өткізілуі болып табылады, бұл жұмыс өнімділігі кестесінен қалуға және нысандарды пайдалануға беру мерзімдерінің орындалмауы қаупіне алып келді», - деп түсіндірді министр.
«Ақ Бұлақ» бағдарламасы «2020 жылға дейін өңірлерді дамыту» бағдарламасына (2015 ж. 1 қаңтардан бастап күшіне енеді), ықпалдастырылғанын ескере отырып, Е.Досаев оны жүзеге асыруға өңірлік басымдықтар принципін жүзеге асыруға пайдалану қажеттігін атап өтті.
Отырыс барысында 2015-2019 жылдарға арналған индустриалдық-инновациялық дамудың мемлекеттік бағдарламасын жүзеге асыру бойынша Іс-шаралар жоспары бекітілді.
