Қазақстанда кәсіпкерлер саны 5%-ға артты – ҰЭМ

14 Қазан, 2014 17:34

2014 жылдың 9 айында Қазақстандағы кәсіпкерлер саны өткен жылдың осы уақытымен салыстырғанда 5%-ға артты, деп мәлімдеді бүгін ҚР Ұлттық экономика министрлігі Статистика комитетінің төрағасы Әлихан Смайылов 2014 жылдың қаңтар-қыркүйек айларындағы Қазқастанның әлеуметтік-экономикалық даму қорытындысы мен елдегі демографиялық ахуалға арналған брифингте.

«2014 жылдың 1 қазанындағы мәлімет бойынша тіркелген заңды тұлғалар саны 350,8 мыңды құрап, өткен жылдың осы уақытымен салыстырғанда 5%-ға артты», - дейді ол.

Сонымен қатар, 2014 жылдың қаңтар-тамыз аралығындағы Қазақстанның сыртқы сауда айналымы 80,4 трлн долларды құрап, өткен жылдың осы уақытымен салыстырғанда 9,1 пайызға азайған. Соның ішінде экспорттың үлесі 53,9 трлн долларды, импорт 26,5 трлн долларды құрайды.

Айта кету керек, 2014 жылдың қыркүйек айындағы тұтыну бағасының индексі 2013 жылдың желтоқсанымен салыстырғанда 105,9 пайызды құрады. Азық-түлік тауарларының бағасы 5,6%, азық-түліктік емес тауарлар 6,7%, халыққа көрсетілетін ақылы қызмет құны 5,4%-ға қымбаттаған.

2013 жылдың желтоқсанымен салыстырғанда 2014 жылдың қыркүйегіндегі өндірістік өнім өндіруші кәсіпорындар бағасы 11,6%-ға артты.

Индира Қауметова