• Басты
  • Алматының Олимпиаданы өткізу бойынша өтініші салмақты – ХОК басшысы

Алматының Олимпиаданы өткізу бойынша өтініші салмақты – ХОК басшысы

13 Қазан, 2014 18:05
Алматының 2022 жылы Қысқы Олимпиада ойындарын өткізу бойынша өтініші өте салмақты және бәсекеге қабілетті. Бұл туралы мегаполиске іс сапары аясында Халықаралық Олимпиада комитетінің президенті Томас Бах мәлім етті.

Қалалық әкімдіктің баспасөз қызметі хабарлағандай, Алматы 2011 жылы өткен қысқы Азия ойындарын өткізу тәжірибесі және мұраларын пайдалана алады. Сонымен қатар, шаһар 2017 жылы өтетін Универсиада тәжірибесіне де сүйене алады.

«Алматы өте салмақты өтініш берді. Оның тұжырымдамасы бүгінде жұмыс істеп отырған инфрақұрылымдарды пайдалануға негізделген. Бұл тұжырымдама бірегей және Алматының кандидатурасы салмақты», - деді журналистермен кездесу барысында Томас Бах.

Олимпиада шығындары туралы айтар болсақ, Ванкувердегі және Сочидегі Олимпиада ойындарын ұйымдастыру комитеті үлкен табысқа кенелді. Оның үстіне Сочиде Олимпиада ойындарына дейін бірде-бір нысан болған жоқ.

«Сочи – бұл ескірген, жазғы демалыс орны  және онда бірде бір жарыс өткізетін нысан болмады. Қонақ үй, тіпті теллекоммуникациялық инфрақұрылымы да жоқ еді. Қысқасы бір аймақты толығымен дамыту керек болды. Бұл нақты инвестицияларды қажет етті. Салыстыру үшін Алматыны алайық. Мұнда жағдай мүлдем бөлек, себебі ол заманауи қала. Телекоммуникациялық инфрақұрылымы дамыған, спорт кешендері де жеткілікті. Демек, мұнда салыстырудыңда қажеті жоқ, олар екітүрлі жоба», - деді Томас Бах.

Ол атап өткендей, ХОК Олимпиада ойындарын өткізуге ниетті қалалардың алдында соншалықты қатаң талаптар қоймайды. Сонымен, бүгінде ХОК қатысушылар мен ресми тұлғалар санын шектеу бойынша бағдарламаны жасақтауда.

«2022 жылы өтетін Олимпиада ойындарын өткізетін қаламен келісімге отыру барысында ұйымдастыру комитетінен талап етілетін  кез-келген өзгертулер  мен шаралар ұйымдастыру комитеті және ХОК-пен келісілген соң енгізілетін болады деп уағдаласатын боламыз. Біз Ойындар ұйымдастырушылар үшін тым үлкен немесе қиын болмауына күш жұмсайтын боламыз», - деп атап өтті Томас Бах. 

Естеріңізге сала кетейік, Алматыға іс сапары аясында ХОК-тің президенті Медеу мұз айдынында, «Сұңқар» халықаралық шаңғы трамплиндері кешенінде, «Шымбұлақ» тау шаңғысы курортын аралады.

Барлық жаңалықтар