ҰЭМ жыл соңына дейін кәсіпкерлерге қатысты тәуекелдерді басқару жүйесін енгізеді
13 Қазан, 2014 16:53
ҚР Ұлттық экономика министрлігі 2014 жылдың соңына дейін кәсіпкерлік субъектілеріне қатысты тәуекелдерді басқару жүйесін енгізеді. Бұл туралы бүгін Мәжілісте «Қазақстан Республикасының кейбір заңнамалық актілеріне кәсіпкерлік қызметті түбегейлі жақсарту мәселелері бойынша өзгерістер мен толықтырулар енгізу туралы» заң жобасының таныстырылымы барысында Ұлттық экономика вице-министрі Қ.Өскенбев мәлім етті.
«Мемлекеттік бақылауды жетілдіру мақсатында тәуекелдерді бағалау негізінде жоспарлы тексерулерін болдырмауды есепке ала отырып кәсіпкерлік субъектілерін тексеруді ұйымдастыру ұсынылуда. Бұл мақсатта жеке кәсіпкерлік субектілеріне қатысты мемлекеттік бақылау мен қадағалауды төрт топқа бөлу қарастырылуда»,- деді Қ.Өскенбаев.
Сонымен, бірінші топқа аса қауіпті қызмет түрі және жиі тексеруді қажет ететін реттеу салаларын енгізу ұсынылды. Бұл салаларға атом энергетикасы, қару айналымы, есірткі заттары, өрт сөндіру және санитарлық-эпидимиологиялық қауіпсіздік жатады.
