• Басты
  • Әзербайжан, Грузия және Армения ЭКСПО-2017 көрмесіне қатысатындықтарын растады – СІМ
10 Қазан, 2014 16:27

Әзербайжан, Грузия және Армения ЭКСПО-2017 көрмесіне қатысатындықтарын растады – СІМ

Үстіміздегі жылғы 6-9 қазан аралығында ЭКСПО-2017 Комиссары – ҚР Сыртқы істер министрінің бірінші орынбасары Рәпіл Жошыбаев бастаған қазақстандық делегация Кавказ елдеріне жұмыс сапарымен барды, деп хабарлады сыртқы істер министрлігі.
Әзербайжан, Грузия және Армения ЭКСПО-2017 көрмесіне қатысатындықтарын растады – СІМ

Армения Сыртқы істер министрі Э.Налбандянмен және Экономика министрі К.Чшмаритянмен кездесулер өтіп, Арменияның ЭКСПО-2017 көрмесіне қатысуы, сондай-ақ екіжақты мәдени-гуманитарлық, сауда-экономикалық және парламентаралық ынтымақтастықты жандандыру мәселелері талқыланды.

Тбилиси қаласында ЭКСПО-2017 Комиссары Грузия Президенті Г.Маргвелашвилимен, Вице-Премьер – Экономика және тұрақты даму министрі Г.Квирикашвлимен және Сыртқы істер министрі М.Панджикидземен кездесті. Президентпен кездесу барысында Комиссар Қазақстан Президенті атынан ЭКСПО-2017 көрмесіне шақыру хатын табыс етті. Г.Маргвелашвили өз кезегінде қазақстандық тарапқа алғысын білдіріп, Грузия Қазақстандағы көрмеге белсенді атсалысатынын хабарлады. Сонымен қатар, Грузияның бірқатар мемлекеттік орган басшыларымен болған кездесулер барысында Қазақстанның Грузиядағы инвестициялық жобалары, екі елдің Үкіметаралық комиссиясының әрекетін жандандыру және туризм саласындағы ынтымақтастық мәселелеріне назар аударылды.

Әзербайжанда Президент Әкімшілігі Басшысының орынбасары Н.Мамедовпен, Энергетика министрі Н.Әлиевпен және Мәдениет министрі А.Гараевпен кездесулер өтті. Кездесулер барысында Әзербайжанның ЭКСПО-2017 көрмесіне қатысуы жөніндегі Қазақстан мен Әзербайжанның тиісті салалық органдары арасындағы өзара іс-қимыл, экономиканың технологиялық, құрылыс, энергетикалық, оның ішінде баламалы энергетика  салаларында қызмет атқаратын корпоративті қатысушыларын жұмылдыру мәселелері талқыланды. Мәдениет және туризм министрлігіндегі кездесуден кейін «Астана ЭКСПО-2017 ҰК» АҚ мен Әзербайжанның туризм индустриясы ассоциациясы арасында ынтымақтастық меморандумына қол қойылды.

Сапардың маңызды қорытындысы ретінде Әзербайжан, Грузия және Арменияның Астанадағы ЭКСПО-2017 көрмесіне қатысуын растағандықтарын атап өтуге болады.

 

Барлық жаңалықтар