Биыл 350 мың терминді қамтитын сөздік жарыққа шығады - С.Сәлемов

9 Қазан, 2014 17:58

Биыл шығарылғалы отырған сөздіктердегі терминдердің жалпы саны шамамен 350 мыңды құрайды, деп мәлімдеді бүгін «Нұр Отан» партиясының «Қазақстан. 2017 мақсаттары. Ұлттық іс-қимыл жоспары» сайлауалды тұғырнамасының «Халық бірлігі» бағыты бойынша сараптама тобының кезекті отырысында ҚР Мәдениет және спорт министрлігі Тілдерді дамыту және қоғамдық-саяси жұмыс комитеті төрағасының орынбасары Серік Сәлемов.

«2000 жылғы сөздіктердің әр томында шамамен 5-6 мың термин қамтылып, барлық терминдер саны шамамен 150-160 терминді құраса, биылғы жылы шығарылатын сөздіктердегі терминдер саны шамамен 350 мыңды құрайды. Бұл көрсеткіш, бір жағынан, қазақ тілінің терминқорының үнемі жаңа терминдермен толығып отыратындығын көрсетсе, екіншіден, бұл салада үлкен жұмыс атқарылып отырғандығын көрсетіп отыр»,- деді ҚР Мәдениет және спорт министрлігі Тілдерді дамыту және қоғамдық-саяси жұмыс комитеті төрағасының орынбасары Серік Сәлемов.

Сонымен қатар, С.Сәлемов алдағы уақытта ҚР Мәдениет және спорт министрлігінде елімізде басып шығарылатын барлық сөздіктердің арнайы орталықта сараптамадан өткізетін арнайы орталық ретінде ведомствоға қарасты мемлекеттік мекеме ашу бастамасы көтеріліп жатқанын айтты.

«Министрлік тарапынан еліміздің барлық аумағында меншік нысанына қарамастан барлық шығарылатын сөздіктерді арнайы орталықта сараптамадан өткізетін арнайы орталық ретінде ведомствоға қарасты мемлекеттік мекеме ашу бастамасы көтерілуде. Мәселенің маңыздылығын ескере отырып алдағы уақытта бұл бастама Үкімет тарапынан қолдау табады деген сенімдеміз», - деді С.Сәлемов.

Оның айтуынша, аталмыш орталық тұратын, қазақ тілінің реттелген терминологиялық қорын қалыптастыру, терминдерді біріздендіру, басқа да сөздіктердегі «ала-құлалықты» реттеу және сөздіктердің бірыңғай базасын қалыптастыру, қазақ тілі терминдерінің көпшілікке қолжетімді электрондық базасын жасау, терминдерді мақұлдау жұмыстарымен айналыспақ.

Бауыржан Мұқанов

Барлық жаңалықтар