Қызылордада алғаш рет бүйрек ауыстыру отасы жасалды –әкімдік

7 Қазан, 2014 18:09

Қызылорда облысында созылмалы бүйрек ауруына шалдыққан науқасқа тұңғыш рет бүйрек трансплантациясы жасалды. Мұндай ота республикада осыған дейін үш облыста ғана жасалған. Облыс әкімі Қ.Көшербаев науқастың көңілін сұрап, сауығып кетуін тіледі, деп хабарлады облыс әкімдігі.

«Ең ауыр операциялардың бірі болып есептелетін отаны облыстық медицина орталығының хирург дәрігерлері мен А.Сызғанов атындағы Ұлттық ғылыми хирургия орталығының дәрігерлері бірлесіп жасады», - делінген хабарламада.

Айта кетейік, Қызылорда қаласының тұрғыны Ердәулет Бозғұловқа туған қарындасы Жаңагүл Бозғұлова донорлық жасап бір бүйрегін берді. Дәрігерлердің айтуынша, қазір екеуінің де жағдайы бірқалыпты. Ұлттық ғылыми хирургия орталығының бас директоры Жеткерген Арзықұлов сәуір айында бүйрек транспланталогиясын меңгеру үшін қызылордалық дәрігерлер А.Н.Сызғанов атындағы Ұлттық ғылыми хирургия орталығында білімін жетілдіріп қайтқанын айтты.

Бүгінгі күні облыстық медицина орталығында ота жасау үшін барлық жағдайлар жасалған, керекті құрал-жабдықтармен қамтамасыз етілген. Денсаулық саласына биыл 35 миллиард теңгеге жуық қаржы қаралды. Бұл өткен жылмен салыстырғанда 18 пайызға артық.

Барлық жаңалықтар