Қатты тұрмыстық қалдықтар нысандарын күрделі жөндеуден өткізу инфекциялық ауруларға шалдығудың алдын алады – Мәтішев

7 Қазан, 2014 16:46

Қатты тұрмыстық қалдықтар нысандарын күрделі жөндеуден өткізу инфекциялық ауруларға шалдығудың алдын алып, қоршаған ортаны ластанудан сақтайды, деп мәлімдеді бүгін ОКҚ брифингінде ҚР Ұлттық экономика министрлігі Тұтынушылар құқығын қорғау комитетінің төрағасы Әлиақпар Мәтішев.

«Бүгінде қатты тұрмыстық қалдықтардың 3 полигоны апаттық жағдайда болғандықтан қоршаған ортаны ластап, инфекциялық аурулардың тарауына себеп болып отыр. Аталмыш нысандар бойынша жобалау-сметалық құжаттарын дайындап, оның құрылысын қолға алу керек. Нысандардың 16 пайызына күрделі жөндеу жүргізу қажет. Тағы 4 пайызын өзге ғимаратқа ауыстыру қажет. Қабылданып жатқан шаралар мен сот шешіміне қарамастан осынау апаттық нысандар қызметтерін жалғастырып отыр. Себебі оларды алмастыратын өзге нысандар жоқ», - дейді.

Оның айтуынша, егер нысандар жабылса, онда халық сұранысы жеткілікті деңгейде қанағаттандырылмай қалуы мүмкін.

«Осы орайда көрсетілетін қызметтердің сапасы мен қауіпсіздігін арттыру мақсатында ҚР ҰЭМ нысандар тізімін дайындады. Сол арқылы 2015-2017 жылдарға сәйкестендіріп қажетті шаралар қабылданбақ. Атқарылған жұмыстар нәтижесінде инфекциялық ауруларға тосқауыл қойылмақ», - дейді ол.

Сонымен қатар, оның айтуынша, осындай нысандардың 16 пайызы құрылысының жобалау-сметалық құжаттарын дайындау керек.

Индира Қауметова