• Басты
  • Қазақ күресінен Х Азия чемпионатының барлық алтындарын қазақстандықтар жеңіп алды

Қазақ күресінен Х Азия чемпионатының барлық алтындарын қазақстандықтар жеңіп алды

6 Қазан, 2014 19:46
Семейде 3-5 қазан күндері өткен қазақ күресінен Х Азия чемпионаты Қазақстан құрамасының толық жеңісімен аяқталды.

Қазақша күрестен Х Азия чемпионатына Ауғанстан, Бангладеш, Ливан, Моңғолия, Иордания, Иран, Ирак, Үндістан, Қырғызстан, Қытай, Йемен, Пәкістан, Қазақстан, Сирия, Тәжікстан, Түрікменстан, Өзбекстан, Шри-Ланка және Ресей секілді Азияның 17 елінен 120 спортшы қатысты.

Тартысты өткен айқаста Азия чемпионы атақтарын Қуат Бектаев (55 кг), Ақзал Арыстанбеков (60 кг), Нұржан Жұмажан (70 кг), Бегімхан Әділбеков (80 кг), Тоқтар Жиентаев (90 кг), Айбат Сейтен (+90) иеленді. Ал әйелдер арасында алғашқы Азия чемпионы атағына Зарина Байбатина (+75)  ие болды.

Бұдан кейін өткен Дәулет Тұрлыхановтың жүлдесі үшін өткен халықаралық турнирде абсолютті салмақ санатында «Қазақстан барысы-2013» Айбек Нұғымаров жеңіске жетіп, бас жүлде - автомобильге ие болды, деп хабарлады Семей қаласының әкімдігі.

«Соңғы жылдары біздің ұлттық спорт ойындарымыз күшті дамып келеді, оған Семей қаласында қазақша күрестен Х Азия чемпионатының өтуі дәлел. Бұл чемпионатқа 17 елден өкілдер қатысты. Шығыс Қазақстан облысының тумасы ретінде менің інілерім - палуандар «Қазақстан барысы» атанған Айбек Нұғымаров пен Мұхит Тұрсыновтың  табыстары қуантады. Жыл асқан сайын республикада спорттың осы түрімен айналысатын палуандар қатары өсіп келе жатқанын атап өткім келеді», - деп пікірімен бөлісті Дәулет Тұрлыханов.

Қазақ күресінен Азия чемпионаты спорттың осы түрін халықаралық деңгейде одан әрі насихаттау мақсатында өткізілді.

Семейдегі қазақ күресінен Азия чемпионатын өткізуді ұйымдастырушылар - ҚР Мәдениет және спорт министрлігі, ҚР Қазақ күресі федерациясы, Шығыс Қазақстан облысының әкімдігі, ШҚО денешынықтыру және спорт басқармасы және Семей қаласының әкімдігі болды.

Барлық жаңалықтар